আজিও দেওবাৰ

📎

নমস্কাৰ,
সকলো কুশলে আছেনে ? 

বহুদিনৰ বিৰতীৰ পাছত ফেচবুক জ্ঞান সম্ভাৰলৈকে বুলি আহিলোঁ । দেওবাৰো, কোঠাটোতে বহি-শুই গাৰ বিষ উঠাই কিছু আমনিও লাগিছে । সেয়ে ভাবিলো কিবা এটাকে লিখো লগতে নতুন ম'বাইলটোত লিখিনো কেনেকুৱা লাগে তাকো চাওঁ । আজি কিছুদিন ধৰি নতুন একোকে লিখাও নাই । প্ৰায়ে লিখো যদিও ইমানদিনে নিলিখাত  কোনো এজনেও অৱশ্যে মোৰ খবৰো  লোৱা নাই দেই !

যিয়েই নহওঁক, আজি এটা সৰু প্ৰশ্ন লৈ আপোনালোকৰ কাষ পালোহি । প্ৰশ্নটো পঢ়িয়েই প্ৰশ্নটো কৰাৰ বাবে মোক আকৌ বেয়া নাপাব ।
ইমান সহজ, ইমান সহজ যে প্ৰশ্নটো ডাঙৰক কৰিবলৈকো বেয়া কাৰণ, প্ৰশ্নটো মই আপোনাক কৰাৰ পাছত ইমানদিনে দলটোলে নহাৰ কাৰণ হিচাপে আৰু এনে এটা প্ৰশ্ন আপোনালোকক কৰাৰ বাবে সাতে-পাছে মিলাই ভাবিয়েই চাগে পেলাব যে ৰাজীৱ চাগে পা*...ল হ'ল !

নাই হোৱা,
আৰু নাইহোৱা বাবেই এই বিশেষ প্ৰশ্নটো আপোনালোকক কৰিবলৈ আগবাঢ়িছো ।
মোৰ বহুদিনৰ নিৰীক্ষণত এইটো কথা স্পষ্ট যে বহুলোকে মই অনা প্ৰশ্নটোৰ সঠিক উত্তৰ দিব নোৱাৰে । তেন্তে আহক, প্ৰশ্নটোনো কি এবাৰ চাওঁ 👉

"সপ্তাহৰ সাত বাৰৰ নাম ক্ৰম- অনুসাৰে কওঁক ।"
➖➖➖➖➖➖➖➖➖➖➖➖➖➖➖

হাঁহি উঠিছেনেকি প্ৰশ্নটো শুনি ?
দুই-এজনৰ কেনেবাকে খঙো উঠিব পাৰে !  আৰু হাঁহি উঠা সকলৰো অধিকাংশই ইয়াৰ উত্তৰ দিবলে হলে অ-প্ৰস্তুত কাৰণ, ই হৈছে দ্বিতীয় শ্ৰেণীত পোৱা প্ৰশ্ন ।
তথাপি, কিবা বিশেষত্ব আছে বুলি দুজনমানে ক'ব ।
কোনোৱে ক'ব, দেওবাৰ........শনিবাৰ আৰু কোনোৱে ক'ব সোমবাৰ...........দেওবাৰ ।

আৰু একেটা প্ৰশ্নকে যদি আপুনি মোক কৰে ???
মই কিন্তু প্ৰথমে আপোনাক ওভোতাই প্ৰশ্ন কৰিম, "ইংৰাজীৰ নে অসমীয়াৰ ?"

এতিয়া গম পাইছেনে, কিয় এই প্ৰশ্নটো কৰিলোঁ ? জধাই-মধাই ওলোৱা কিছুমান বাহিৰা কিতাপত এই প্ৰশ্নটোৰ উত্তৰে সময়ে  সৰু ল'ৰা-ছোৱালীৰ মাজত সমস্যাৰ সৃষ্টি কৰে । আপুনি যদি ভাৰতীয় পঞ্জিকাৰ মতে ক'বলৈ যায় তেন্তে উত্তৰ হ'ব দেওবাৰ........শনিবাৰ কাৰণ, ভাৰতীয় ৰীতিত সপ্তাহটো দেওবাৰৰ পৰা আৰম্ভ হয়  আৰু যদি আপুনি ইংৰাজী কেলেণ্ডাৰমতে উত্তৰ দিয়ে তেন্তে উত্তৰ হ'ব সোমবাৰ.......দেওবাৰ ।

খ্ৰীষ্টান সকলে বিশ্বাস কৰে দেওবাৰৰ দিনটো ভগৱানৰ জিৰণি দিন । সপ্তাহৰ শেষৰ দিন আৰু এই  শেষৰ দিনটোত God-এ জিৰণি লয় আৰু সেয়ে সেইদিনা মানুহৰ দৈনন্দিনো কিছু আৰামৰ কৰি দি বিভিন্ন বিদ্যালয়, অফিচ বন্ধ ৰখা হয় ।

পুৰণি ভাৰতীয় পৰম্পৰাত সপ্তাহত নিৰ্ধাৰিত কোনো এটি বাৰকেই বন্ধৰ দিন বুলি বিবেচনা কৰা নাছিল অৱশ্যে, সোমবাৰৰ দিনটোত মহাদেৱ শিৱ ভোলানাথৰ আৰাধনাৰ বাবে কোনো- কোনোৱে সংৰক্ষিত বাৰ হিচাপে ধৰিছিল । মধ্যযুগৰ ভাৰতত মোগল সকলৰ শাসনৰ সময়ত শুক্ৰবাৰৰ দিনটোক বন্ধৰ বাৰ হিচাপে গণ্য কৰা হৈছিল কিয়নো, মু্ছলমান সকলৰ পৰম্পৰাত শুক্ৰবাৰে অধিক সময়ৰ বাবে নামাজ পঢ়াৰ নিয়ম ৰক্ষিত ।
ইয়াৰ পৰবৰ্তী সময়ত ঊনৈছ শতিকাৰ চাৰি   দশকৰ প্ৰাৰাম্ভত (১৮৪০-১৮৪৩-ৰ ভিতৰত) বৃটিছ সকলৰ ভাৰত শাসনৰ সময়ত পশ্চিমীয়া এলেহুৱা দেওবাৰে আমাৰ দেশত বন্ধৰ দিন হিচাপে প্ৰথম পৰিচয় লাভ কৰিছিল।

বৃটিছ গ'লগে, থাকি গ'ল কিছু চিন, কিছু নিয়ম আৰু আদব-কায়দা । তাৰে ভিতৰত কেলেণ্ডাৰৰ পাতত আজিও জিলিকি ৰ'ল ৰঙাকৈ লিখা এই দেওবাৰবোৰ ; এলেহুৱা আৰু আপদিয়া কিছুমান ৰঙা দেওবাৰ । চাল্লা, গাৰ বিষ উঠাই দিলে !

              শুভ দুপৰীয়া 🌥🌱🐦

            ▬▬▬▬▬▬▬▬▬▬
☼ আমাৰ ফেচবুক ঠিকনা 📬
✉ https://www.facebook.com/groups/372830512757409/

আমাৰ📧 facebookgyansambhar@gmail.com
          🔅ফেচবুক জ্ঞান সম্ভাৰ 🔅
           ◀🔸🔸🔸🔴🔹🔹🔹▶

অসমৰ বিভিন্ন উদ্ভিদৰ ইংৰাজী আৰু বৈজ্ঞানীক নাম

চুম্বক আৱিষ্কাৰৰ কাহিনী

বিজ্ঞানৰ বিভিন্ন আৱিষ্কাৰৰ কাহিনী সঁচাই
আমোদজনক ।
ফেচবুক জ্ঞান সম্ভাৰৰ মাননীয় সদস্য-সদস্যা সকল,আজি কবলৈ ওলাইছো বিজ্ঞান আৰু প্ৰযুক্তি বিদ্যাৰ জগতত সুদুৰ প্ৰসাৰী প্ৰভাৱ পেলোৱা এক আৱিষ্কাৰৰ কথা ।

ঘটনাটো সম্ভৱতঃ গ্ৰীচৰ ।
মেগনিছ নামৰ এজন ভেড়াৰখীয়া আছিল ।
পুৱাতেই ভেড়াৰ জাকটো লৈ চৰাই ফুৰি
সন্ধিয়া ভেড়াবোৰ লৈ তেওঁ ঘৰলৈ উভটে ।
দৈনিক দিনলিপিত ভেড়াবোৰ তেওঁৰ যেন পথৰ
লগৰী । এডাল লাঠি আৰু এটা মোনা লৈ ওৰেটো
দিন ঘূৰি-ফুৰে তেওঁ ।

এদিনৰ ঘটনা, ভেড়াৰ জাকটো লৈ শিলাময়
পাহাৰ এটাত তেওঁ আগবাঢ়িছে ।
হাতৰ লাখুটি ডালত ভেজা দি কঠিন শিলৰ
ওপৰেদি খুপি-খুপি আগবাঢ়োতে হঠাতে তেওঁ
থমকি ৰ’ব লগা হ’ল । কি আচৰিত, তেওঁ আগবাঢ়িব খোজিলেও হাতৰ লাখুটি ডালে তেওঁক আগুৱাই যোৱাত বাধা প্ৰদান কৰিছে । ঘটনাটোত
মেগনিছ চমকি উঠিল !!!! 

এক অদৃশ্য শক্তিয়ে এটা ক’লা শিলৰ ওপৰত তেওঁৰ লাখুটি ডাল জোৰেৰে লগাই ৰাখিছে । 

ঘটনাটোত বিস্ময় মানিলে সেই ভেড়া ৰখিয়াজনে । লাখুটিডালৰ লো লগোৱা আগটো শিলটোত জোৰেৰে লাগি থকাত গাৰশক্তি প্ৰয়োগ কৰোতে যেনিবা লাখুটিদাল আঁতৰি আহিল ।

প্ৰকৃততে শিলটো আছিল এটা প্ৰাকৃতিক চুম্বক ।
ঘটনাটোত সেই শিলটোও বিখ্যাত হৈ পৰিল ।
পাছলৈ ভেড়াৰখীয়াজনৰ নামেৰে গ্ৰীক সকলে
এনে শিলক ‘মেগনেটাইট’ নাম দিছিল আৰু
পাছলৈ এই শব্দটোৰ পৰাই ‘মেগনেট’ শব্দটোৰ সৃষ্টি হ’ল ।
এই ‘মেগনেট’ বা চুম্বকক লৈ চলিল বহু গৱেষণা ।

অ’......., প্ৰেৰি গ্ৰীনাছ নামৰ এজন বিজ্ঞানীয়ে
চুম্বকৰ এটা ডাঙৰ বৈশিষ্ট আৱিষ্কাৰ কৰিছিল ।
তেখেতে লক্ষ্য কৰিছিল, মুক্তভাৱে ওলমাই ৰখা
চুম্বকে সদায় উত্তৰা-দক্ষিণাকৈ থাকে ।
আজিলৈ ইমানতে সামৰিছো ।

আপোনালোকলৈ শ্ৰদ্ধাৰে.........
     ফেচবুক জ্ঞান সম্ভাৰ

*ফেচবুকত আমাৰ ঠিকনা : https://m.facebook.com/groups/372830512757409?

◀🔅🔹🔹🔹⚫🔹🔹🔹🔅▶

কৃষ্ণ,এক চমু আলোকপাত ............

❇ 

কৃষ্ণ,

এক চমু আলোকপাত ............

                                  

“যদা যদা হি ধৰ্ম্মস্য গ্লানিৰ্ভৱতি ভাৰত ।অভুত্থানমধৰ্ম্মস্য তদাত্মানং সৃজাম্যহম্ ।।
পৰিত্ৰাণায় সাধুনাং বিনাশায়চ দুষ্কৃতাম ।
ধৰ্ম্ম সংস্থাপনাৰথায় সম্ভৱামি যুগে-যুগে ।। ৮
                         —--- চতুর্থ আধ্যায়/গীতা
                                                                                                                            
         অধৰ্মৰ অৰ্ভূত্থান ঘটি যেতিয়া ধর্মত নানান অধর্মই আহি গ্লানি আনে আৰু অসৎ লোকৰ হাতত যেতিয়া সাধু সকলে নিগ্ৰহ ভূঞ্জে তেতিয়া ধৰ্মক ৰক্ষা কৰিবৰ বাবে, সাধু সকলক ৰক্ষা কৰিবৰ বাবে ভগৱানে যুগে-যুগে পৃথিৱীত অৱতাৰ ধাৰণ কৰে । তাৰ উদাহৰণ বিশ্ব ইতিহাসত বহুতো দিব পৰা যায় আৰু তাৰে ভিতৰত কৃষ্ণও অন্যতম ।
     
আজি জন্মাষ্টমী, হিন্দু সকলৰ আৰাধ্য দেৱতা ভগৱান শ্ৰীকৃষ্ণৰ উপজা দিন । ভাৰতৰ লগতে বিশ্বৰ বিভিন্ন প্ৰান্তত ভগৱানৰ জন্মদিনটো অতি উলহ-মালহৰে ভক্তি প্ৰেমত একাত্ম হৈ পালন কৰা হয় । এই আপাহতে জ্ঞান সম্ভাৰৰ মজিয়াত আহক ভগৱান শ্ৰীকৃষ্ণৰ বিষয়ে আলোচনা কৰোঁ ................

      
       বিষ্ণুৰ পূৰ্ণ অৱতাৰ ভগৱান শ্ৰী কৃষ্ণ । “কৃষ্ণ” শব্দটো কৃষ ধাতুৰ পৰা সষ্টি হোৱা আৰু কৃষি/সংসাৰৰ সৈতে জৰিত । তাতে  ‘ণ’ মুক্তি বাচক ।  “কৃষ্ণ” শব্দই আকৌ ক'লাও বুজাই ।
      দ্বাপৰ যুগৰ শেষৰ ফালে বৃষ্ণি বংশত পিতৃ বাসুদেৱ আৰু মাতৃ দৈৱকীৰ অষ্টম পুত্ৰ ৰূপে এখেতে জন্ম গ্ৰহণ কৰে । ভাদ মাহৰ কৃষ্ণ পক্ষ অষ্টমী তিথিৰ মাজনিশা  মথুৰাৰ ৰজা কংশৰ কাৰাগাৰত কৃষ্ণৰ জন্ম । ঘটনাৰ তাগিদাত জন্ম নিশাই  দৈৱশক্তিৰ সহায়ত তেখেত গকুলৰ নন্দ গৃহলৈ স্থানান্তৰ হয় আৰু তাতে ডাঙৰ হয় ।
নানন বৰ্ণাঢ্য ঘটনাৰ মাজেৰে নন্দক পিতৃ আৰু যশোদাক মতৃ ৰূপে গ্ৰহণ কৰি শৈশৱ পাৰ কৰে আৰু বহুতো অসুৰ নিধন কৰি সকলোকে আচৰিত কৰে । শৈশৱ-কৈশোৰত গুৰু সান্দিপনীৰ ওচৰত কৃষ্ণে শিক্ষা গ্ৰহণ কৰে । এইজন সান্দিপনী গুৰুৰ আশ্ৰমতে কৃষ্ণই ভগৱান পৰশুৰামৰ পৰা অস্ত্ৰ সুদৰ্শন চক্ৰ লাভ কৰিছিল ।
শিক্ষা গ্রহণৰ পাছত ঘটনাক্রমে কৃষ্ণ আৰু তেওঁৰ ককায়েক বলৰামে মথুৰালৈ যাত্ৰা কৰে আৰু মথুৰাৰ অত্যাচাৰী ৰজা মোমায়েক  কংশক নিধন কৰি কংশৰ দেউতাক উগ্ৰসেনক কাৰাগাৰৰ পৰা মুক্ত কৰে আৰু ককাকক ৰজা পাতি নিজেও ৰাজনীতিৰ লগত জৰিত হৈ পৰে ।
ইয়াৰ পাছত তেওঁ সাগৰৰ মাজত দ্বাৰকা নামে এখন ৰাজ্য প্রতিষ্ঠা কৰে আৰু এগৰাকী অসমীয়া কন্যা ভীষ্মক ৰজাৰ জীয়ৰী ৰাজকুমাৰী ৰুক্মিণীক বিয়া কৰাই ।

দ্রৌপদীৰ সয়ম্বৰ সভাত কৃষ্ণৰ সতে পঞ্চ-পাণ্ডবৰ চিনাকী হয় আৰু পাছলৈ সম্পৰ্ক ঘটে । তাৰে পৰিণতিত পাছলৈ  বিশাল মহাভাৰতীয় কাণ্ডত কৃষ্ণ হৈ পৰে মহানায়ক । সেই মহাভাৰীয় যুদ্ধৰ একপ্ৰকাৰ চালিকা শক্তি হৈ কৃষ্ণই এজন সু-চতুৰ ৰাজনীতিজ্ঞৰ পৰিচয় ডাঙি ধৰে । উল্লেখযোগ্য, মহাভাৰতীয় যুদ্ধৰ প্ৰাকক্ষণত যুদ্ধৰ প্ৰতি উদাস অৰ্জুনক এইজন কৃষ্ণই মহান গীতা শাস্ত্র ৰচি অৰ্জুনক শ্ৰৱণ কৰাইছিল আৰু উদাসীনতা দূৰ কৰিছিল ।
ৰাজনীতি, যুধনীতি, সমাজনীতি আৰু ধৰ্মনীতিত মহান পণ্ডিত আছিল তেওঁ ।
কুৰুক্ষেত্ৰ ৰণৰ পাছত গান্ধাৰীৰ পৰা শাপগ্ৰস্ত হৈছিল এইজন কৃষ্ণ । মহাভাৰতীয় যুদ্ধৰ পাছত (প্ৰাপ্ত তথ্য মতে ৩৬ বছৰ ) সেই শাপৰ পৰিণতিত তেওঁৰ বংশ ধ্বংস হৈছিল ।
নিজ বংসৰ ধ্বসৰ পাছত “জৰা” নামে ব্যাধে কৃষ্ণৰ চৰণক হৰিণা বুলি নিক্ষেপ কৰা শৰৰে বৃদ্ধ হৈ  শ্ৰীকৃষ্ণৰ বৈকুণ্ঠ প্ৰাপ্তি ঘটে ।

🔴

🙏 কৃতজ্ঞতা আৰু সহায়ক গ্ৰন্থ📚

হেমকোষ —--- হেমচন্দ্র বৰুৱা,
নাৰায়ণ বৰপূজাৰীৰ —----     কীৰ্ত্তন ঘোষা সহায়িকা

   

ফেচবুক আমাৰ ঠিকনা :
https://www.facebook.com/groups/372830512757409/

◀🔵🔹🔸💠🔸🔸🔘🔸🔸💠🔸🔹🔵▶

বংশগতি

        সাধাৰণভাৱেই বাপেক-মাক, ককাক আদিৰ দৈহিক গঠন, আচৰণ আদি ল'ৰা-ছোৱালীলৈ🚸 যায়  বা বাপেক-মাকৰ🚻 গঢ় শিশুৰ ওপৰত পৰে । আচৰিত নহয়নে ❔

আনহে নালাগে মানসিক শক্তিলৈকে এই বংশগত প্ৰভাৱ থাকে ।
এটা উদাহৰণ  দিছো ☞

আপুনি যদি এজন বিদ্যালয় শিক্ষক 👤
তেন্তে শ্ৰেণীকোঠাৰ এই অৱস্থাটো আপোনাৰ বাবে সদা পৰিচিত  ।
যেতিয়া আপুনি শ্ৰেণীকোঠাত কোনো এটা বিষয় 📖 শিকাই থাকে তেতিয়া এইটো কথা আপুনি প্ৰায়ে মন কৰিছে যে একাংশ ছাত্ৰ-ছাত্ৰীয়ে অতি সহজতে বিষয়টো শিকাৰ বিপৰীতে কেইজনমানে অলপ বুজি পাইছে আৰু কিছুমানে একো বুজিয়েই পোৱা নাই ।
একেটা শ্ৰেণীকোঠা, একেজন শিক্ষকে👤 একে সময়তে সকলো শান্ত ছাত্ৰ-ছাত্ৰীক পঢ়াইছে তাতো এনে এক বিশাল পাৰ্থক্য  ।

বছৰদিয়েক আগতে হ'বলা, ফেচবুক জ্ঞান সম্ভাৰত লিখিছিলো যে শ্ৰেণীকোঠাত সাধাৰণতে তিনি শ্ৰেণীৰ ছাত্ৰ-ছাত্ৰী থাকে ☞

▫ উচ্চ বুদ্ধি সম্পন্ন ছাত্ৰ-ছাত্ৰী
▫ মধ্যম বুদ্ধি সম্পন্ন ছাত্ৰ-ছাত্ৰী আৰু,
▫ দুৰ্বল বুদ্ধি সম্পন্ন ছাত্ৰ-ছাত্ৰী ।

মোৰ ভাষাৰে হ'লে হেলজেন লাইট, টিউব লাইট (চক থকা) আৰু ড্ৰিম লাইট 💡 ।

কিন্তু কথা হ'ল এনে কিয় হয় ?
আপুনি নিশ্চয় ক'ব "পৰিৱেশ" আৰু "বংশগতি"-ৰ প্ৰভাৱ ।

হয়, আপুনি ঠিকেই ভাবিছে । কিন্তু এই লেখাত "পৰিৱেশ"-ক আঁতৰাই ৰাখি দুটামান আমোদজনক তথ্যৰে আজি ফেচবুক জ্ঞান সম্ভাৰলৈ লৈ আনিছো এটি বিশেষ লেখা ☞

            ☣ "বংশগতি" (HEREDITY) ☣
           ➖➖➖➖➖🔅➖➖➖➖➖

    শিশুৰ যেতিয়া জন্ম হয় তেওঁলোকে কিছুমান বিশেষ গুণ জন্মতেই পিতৃ-মাতৃ লগতে পুৰ্ব-পুৰুষৰপৰা লগত লৈ আহে । এই গুণবোৰকে একেলগে কোৱা হয় "বংশগতি" বা ইংৰাজীত বোলা হয় HEREDITY  ।
পিটাৰচনৰ মতে, "পূৰ্ব-পুৰুষৰ পৰা পিতৃ-মাতৃৰ যোগেদি যি পোৱা যায় সেয়ে হৈছে বংশগতি ।"
ডৌগ্লাচ্ৰ মতে, বংশগতিত পিতৃ-মাতৃৰ কৰ্মশক্তি, দৈহিক বৈশিষ্ট্য আৰু গঠন সমূহ থাকে ।
এইটো কেনেকৈ ঘটে সেই বিষয়লৈ যোৱাৰ আগত কিছু তথ্যৰ আলোকপাত কৰি লোৱা হ'ল :

পুৰুষ-মহিলাৰ 👫 মিলনত যেতিয়া শুক্ৰানু আৰু ডিম্বাণু যোজিত হয় তেতিয়া ডিম্বাণু উৰ্বৰ হয় বা নিষেচন হয় । এনে উৰ্বৰ ডিম্বাণুক প্ৰাণী বিজ্ঞানত কোৱা হয় জায়গ'ট (ZYGOTE) ।
ZYGOTE নামৰ এই যোজন কোষটোত ৪৬ ডাল ক্ৰম'জম থাকে ।

লাগিল নহয় লেঠাটো । এই ক্ৰম'জমনো আকৌ কি ?
আমি জানো, জীৱ কোষৰ কেন্দ্ৰস্থল হৈছে নিউক্লিয়াছ । এই নিউক্লিয়াচতে থকা প্ৰ'টিন, যাক অসমীয়াত আমি মাংসসাৰ বুলি কওঁ তাৰে গঠিত পূৰ্ব-পুৰুষৰ লক্ষণ বহন কৰি থকা জিন বিলাকৰ ধাৰক থাকে । এই ধাৰকেই হৈছে ক্ৰম'জম । প্ৰত্যেকটো ক্ৰম'জমত চল্লিছৰ পৰা এশটা জিন থাকে ।
মাননীয় পাঠক সকল, ২০১৪ চনত ক্ৰম'জম বিষয়ক আন এটি লেখা দলটোত আগবঢ়াইছিলো । যি সকলে পঢ়া নাই তেখেতসকলে এই লেখাটো পঢ়াৰ অন্তত https://m.facebook.com/groups/372830512757409?view=permalink&id=892896327417489 এই ঠিকনাৰে গৈ লেখাটো পঢ়িবচোন ।

যি কি নহওঁক, ZYGOTE-ত থকা পিতৃ-মাতৃৰ গুণ আৰু দৈহিক গঠন যুক্ত ক্ৰম'জম বিলাকে শিশুলৈ বংশানুক্ৰমিক ভাৱে গুণবোৰ কঢ়িয়াই ।
এই ক্ৰম'জম ৪৬ ডাল বা ২৩ যোৰ ।
ইয়াৰে ২৩ ডাল পুৰুষৰ আৰু ২৩ ডাল মহিলাগৰাকীৰ পৰা আহে ।
প্ৰত্যেকৰে ২৩ ডাল ক্ৰমজমক আকৌ দুটা প্ৰধান ভাগত ভাগ কৰিব পাৰি ।

🔹শৰীৰ ক্ৰম'জম আৰু
🔹লিংগ ক্ৰ'মজম ।

প্ৰতিজনৰ ২৩ ডাল ক্ৰম'জমত শৰীৰ ক্ৰ'মজম ২২ ডাল আৰু লিংগ ক্ৰম'জম এডালকৈ থাকে ।
এইখিনিতেই এটা ডাঙৰ ৰহস্য আছে ।
যদি জানে খুবেই ভাল কথা আৰু যদি নাজানেও আহকচোন আলোচনাটো আগবঢ়াই নিও ....................

📆 ৩০-১১-২০১৮
➖➖➖➖➖➖

শৰীৰ ক্ৰম'জম পূৰ্ব-পুৰুষৰ শাৰীৰিক লক্ষণ তথা চৰিত্ৰ সমূহৰ বাহক হোৱাৰ বিপৰীতে লিংগ ক্ৰম'জমে #জায়গ'ট কোষটো মানৱ শিশু হিচাপে জন্ম হওঁতে ল'ৰা হ'ব নে ছোৱালী হ'ব সেয়া নিৰ্ধাৰণ কৰে ।
লিংগ ক্ৰম'জম আকৌ দুই প্ৰকাৰৰ ।
X আৰু Y । X ক্ৰম'জমে কন্যা সন্তান আৰু Y ক্ৰম'জমে ল'ৰা সন্তানৰ জন্ম দিয়ে ।  কিন্তু সন্তানৰ লিংগ নিৰ্ণয় হ'ব পুৰুষৰ শুক্ৰানুৰ পৰা । উল্লেখযোগ্য, মহিলাৰ ডিম্বাণুত সদায় X লিংগ ক্ৰম'জমহে থাকে আৰু সি নিৰপেক্ষ ভূমিকাৰে শুক্ৰানুৰ ওপৰত নিৰ্ভৰ কৰি কন্যা বা ল'ৰা সন্তান ভূমিস্থ কৰে। শুক্ৰানুত যিহেতু X আৰু Y দুয়োটাই থাকে গতিকে পুৰুষৰ পৰা Y ক্ৰম'জম প্ৰাপ্তিৰে ডিম্বাণু উৰ্বৰ হ'লে XY মিলি ল'ৰা সন্তান আৰু X ক্ৰম'জম প্ৰাপ্তি হ'লে XX মিলি কন্যা সন্তান জন্ম হ'ব ।

আচৰিত নহয়নে কথাবিলাক ❕
কিন্তু ৰ'ব, মোৰ বাবে ইয়াতকৈও আচৰিত কথাটো এতিয়াও কোৱাই নাই ।
আজিৰপৰা হাজাৰ-হাজাৰ বছৰৰ আগতেই আয়ুৰ্বেদ বিজ্ঞানী তথা প্ৰাচীন ভাৰতীয় চিকিৎসক "সুশ্ৰুকে" এইটো গম পাইছিল যে সন্তানৰ লিংগ পুৰুষৰ দ্বাৰা নিৰ্ধাৰিত হয় ।
হে ভগৱান,সেই যুগতেই তেখেতে বাৰু কেনেকৈ গম পাইছিল সেই কথা । এনে কথাই মোৰ গাৰ নোম ঠিয় কৰি দিয়ে । হ'লেও শীতৰ ৰাতি, অন্নমুঠি আৰু শীতল কৰাৰ ইচ্ছা মোৰ নাই । 
কথাটো ভাবিহে মোৰ মুখখন মেল খাই গৈছে, আপোনাৰ ❓

                     ⚪ 🔹🔹🔸🔸⚪

🔘 কৃতজ্ঞতা : লেখাটো NIOS.-ৰ ৫০৬ নং পাঠ্যপুথিৰ গোট নং-২ৰ আধাৰত প্ৰস্তুত কৰা আৰু কিছু অতিৰিক্ত তথ্য বিকাশপেদিয়াৰ ডাক্তৰ মনোজ কুমাৰ শইকীয়াৰ লেখাৰ পৰা বিদ্যায়তনিক চৰ্চাৰ স্বাৰ্থত সহায় লোৱা হৈছে তাৰবাবে লেখক সকললৈ কৃতজ্ঞতাৰ শৰাই আগবঢ়াই সামৰিলো,

                            ধন্যবাদ 🐦
                      🌠  শুভৰাত্ৰি 🌾

🎤🔊 ফেচবুকত আমাৰ ঠিকনা📮
https://www.facebook.com/groups/372830512757409/

📧 facebookgyansambhar@gmail.com
📶 8⃣0⃣1⃣1⃣......
                 🔅ফেচবুক জ্ঞান সম্ভাৰ🔅
                      💠🔸🔹⚫🔹🔸💠

আললগা বামুণ

কথাটো কিবা আচহুৱা যেন লগা নাই নে ?
কি এই আললগা বামুণ ❕❗
ৰ'ব তেন্তে আজি  অসম বুৰঞ্জীলৈকে এপাক যাওঁ ।
স্বৰ্গদেউ চুখামফা (১৫৫২-১৬০৩) যাক আমি 'খোৰা ৰজা' নামেৰেও জানো, তেখেতৰ দিনৰ কথা । এবাৰ ১৫৬২ চনত চিলাৰায় আহিল আহোম ৰাজ্য আক্ৰমণ কৰিবলৈ । চিলাৰায়ৰ আকৌ এটা বৰ ডাঙৰ নিয়ম আছিল । তেওঁ গো (গৰু) বধ আৰু ব্ৰাহ্মণ বধ নকৰিছিল । নকৰিছিল মানে এই দুই বধলৈ তেখেতে ভয়েই কৰিছিল । সেই কথাটো খোৰা ৰজাই আকৌ জানে । তেওঁ তাৰে এটা ৰাজনৈতিক কৌশল উলিয়ালে । কি কৰিলে জানে , প্ৰথমে সকলো খেলৰ পৰা যুঁজলৈ মানুহ গোটালে আৰু তাৰপাছত তেওঁলোকক লগুণ পিন্ধাই দি বামুণ সজাই দিলে।

তাৰপাছত ঘটনাটো আৰু জমনি বুজিছে 😂। লগুণ পিন্ধা নকল বামুণ সকলক একোটাকৈ বলধৰ পিঠিত বহাই, দিলে নহয় ৰণলৈ পঠাই । যেই ৰণলৈ পঠিয়াই দিলে আৰু ৰণাঙ্গণত চিলাৰায়ে তেওঁলোকক দেখা পালে চিলাৰায়ে বামুণৰ লগত যুদ্ধ নকৰো বুলি ওভটি গ'ল ।
খোৰা ৰজাই সেই কথাত বৰ ৰং পালে আৰু সেই নকল বামুণ সকলক পুৰস্কাৰ দিব খোজাত তেওঁলোকে তেওঁলোকক বামুণ কৰিয়েই ৰাখিবলৈ ৰজাক অনুৰুধ জনাইছিল ।
ৰজায়ো তেওঁলোকক বামুণ হিচাপে স্থান দিলে যদিও নাম ৰাখিলে "আললগা বামুণ'' ।

          শুভ নিশি 🎊

▬▬▬▬▬▬▬▬▬▬
☼ আমাৰ ফেচবুক ঠিকনা 📬
✉ https://www.facebook.com/groups/372830512757409/

আমাৰ📧 facebookgyansambhar@gmail.com
        🔅ফেচবুক জ্ঞান সম্ভাৰ 🔅
         ◀🔸🔸🔸🔴🔹🔹🔹▶

শ্ৰীশ্ৰী মাধৱদেৱৰ “নামঘোষা’’:

📎

      শ্ৰীশ্ৰী মাধৱদেৱে জীৱন বেলিৰ শেষ সময়ত ৰচনা কৰা ওৰেটো জীৱনৰ মহা সাধনাৰ অমৃত ফল ৰূপী গ্ৰন্থ ‘নামঘোষা’ । অসমীয়া সাহিত্য জগতত চিৰ জ্যোতিষ্মান, অনুপম কাব্য সাহিত্যৰ আকৰ তথা বৈষ্ণৱ ধৰ্মৰ চাৰিপুথিৰ অন্যতম ‘নামঘোষা’ মাধৱদেৱৰ জীৱনৰ শেষ ৰচনা য’ত, উদ্ভাসিত হয় মহাপুৰুষ গৰাকীৰ জীৱনৰ সাধনা আৰু আকুল ভক্ত হৃদয়ত জাগি উঠা ভগৱত প্ৰীতি ও গুৰু বন্দনা ।

‘নামঘোষা’ এখন ধৰ্মীয় গ্ৰন্থই নহয়, এখন বিশাল হৃদয়ৰ পৰা কাব্যলঙ্কাৰেৰে পুষ্ট হৈ সৃষ্টি হোৱা অসমীয়া সাহিত্যৰ এক অসাধাৰণ মনি ৰত্নও । মাধৱৰ ৰসময় ভকতিৰ প্ৰেম অমৃতৰ নদী, লগতে সমগ্ৰ জীৱনৰ আধ্যাত্মিক উপলব্ধি কেন্দ্ৰিভূত হৈ থকা তেখেতৰ জীৱনৰ কীৰ্তি-স্তম্ভ ।।

গুৰু বাক্যক ৰক্ষা কৰি লিখা হৈছিল ‘নামঘোষা’ ।চৰিত পুথিৰ মতে, কোচবিহাৰলৈ যোৱাৰ সময়ত মাধৱদেৱক উদ্দেশ্যি শঙ্কৰদেৱে কৈছিল, “বঢ়াৰ পো, সৰ্ব্বস পালন কৰিবা ; নাহো মানে ঘোষা নামে এখনি গ্ৰন্থ কৰিবা আমাৰ পাছত যেন ৰৌ-বৰালীৰ পৰা ডৰিকণালৈকে ৰয় যেনেকৈ । দহ হাজাৰ বৈকুণ্ঠৰ নাম দিবা ।’’
অৱশ্যে, ‘নামঘোষা’ৰ ৰচনা শঙ্কৰদেৱৰ তিৰোধানৰ বহু পাছহে সমাপ্ত হোৱা ।সাম্প্ৰদায়িক জটিলতাৰ তাগিদাত বৰপেটা সত্ৰ এৰি ভেলাডোৱাৰত (কোচবিহাৰ) সত্ৰ পাতি থাকোতে মাধৱদেৱে ১৫৯০-৯৬ চনত ‘নামঘোষা’ৰ কাম সম্পূৰ্ণ কৰে ।
এহেজাৰ ঘোষা বিভিন্ন ছন্দত অতি সুললিত ভাৱে ৰচনা কৰা বাবে ‘নামঘোষা’ক ‘হেজাৰি ঘোষা’ও বোলা হয় ।
মাধৱৰ নিৰগুণ ভকতি এই এহেজাৰ ঘোষাৰ মাজেৰে বৰ আকৰ্ষণীয় হৈ ফুটি উঠিছে ।
ড° বাণীকান্ত কাকতিৰ মতে – “নামঘোষাত প্ৰধানত তিনিটা ভাৱৰ ধাৰা মিহলি হৈ বিশাল আনন্দ সাগৰৰ ফালে প্ৰৱহমান হৈছে- পূণ্যশ্লোক শঙ্কৰস্মৃতি, মাধৱদেৱৰ আত্মলঘিমা আৰু কৃষ্ণভক্তিৰ মাহাত্ম্য ।”(ড° বাণীকান্ত কাকতিৰ পুৰণি অসমীয়া সাহিত্য/পৃ: ৬৬) ।
এই এহেজাৰ ভাগ ঘোষাৰ সাৰ মৰ্ম আকৌ গুৰুজনাই এভাগ ঘোষাৰ মাজতেই প্ৰকাশ কৰিছে-

‘মুক্তিত নিষ্পৃহ যিটো সেহি ভকতক নমো
ৰসময় মাগোহো ভকতি
সমস্ত মস্তক মনি নিজ ভকতৰ বশ্য
ভজো হেন দেৱ যদুপতি ।।’

আজি মহাপুৰুষ জনাৰ পবিত্ৰ তিথিত ফেচবুক জ্ঞান সম্ভাৰৰ তৰফৰ পৰা শত কোটি শ্ৰদ্ধাৰে …………………..

☞ ফেচবুকত আমাৰ কৰাপাট ✿ : https://m.facebook.com/groups/372830512757409?

                       ফেচবুক জ্ঞান সম্ভাৰ 

   🔅 ☸  🔘🔸🔸🔸💠🔸🔸🔸🔘 ☸ 🔅

মাজনী লৈ আহিছো কেমেৰা 📷 ........

একেটা ভুলেই কেবাবাৰো হৈছে ।
সেয়ে আজিকালি তেনেকুৱা দেখিলে গম পায়েই যাওঁ । মনতে ভাবো, “ অ’ কেছটো মানে নগেন ।”
মোৰ বোধেৰে আপোনালোকৰো চাগে দেখিলে তেনেকুৱাই লাগিব !
নালাগিবনে …….. !!!
কথা নাই বতৰা নাই নিজান ঠাইত যেতিয়া এটা ল’ৰাই যতিন বৰাই চিনেমাত হাত দুখন মেলি পজ দিয়াদি দি অকলে ৰৈ থাকিব আৰু তেনেকুৱাতে হঠাৎ যদি আপুনি দেখা পাই কি বুলি ভাবিব বাৰু?
     দৃশ্যটো আজিকালি একেবাৰে সুলভ হৈ পৰিছে । পথাৰ, দলং, বাইপাছ আদিত এনেকৈ পজ দি ৰৈ থকা ল’ৰা আপুনি প্ৰায়ে দেখিব । উৎসুকতাবসতঃ আপুনি যদি ভালকৈ মন কৰে দেখিব তাৰ অলপ দূৰত আৰু এটা । হাতত এটা ডি.এছ.এল.আৰ. কেমেৰা ।
     কেমেৰাৰে সৃষ্টিশীল প্ৰতিভাক সুন্দৰকৈ ধৰি ৰাখিবৰ বাবে বা বাণিজ্যিক কামত উন্নত মানৰ কেমেৰা আৰু ব্যক্তিগত ফটোৰ বাবে সৰু কেমেৰাৰ প্ৰয়োজন বুলি মোৰ এটা ভুল ধাৰণা আছিল ; মনৰ চুকত অৱশ্যে আজিও আছে ।
কিন্তু আজিৰ তাৰিখত দেখিছো কথাটো সঁচাই নগেন । বিলাসিতাৰ বাবে বহুতকে লাগে উন্নতমানৰ এটা কেমেৰা, ডি.এছ.এল.আৰ. ।
এটা দামী ম’বাইল, এখন দামী বাইক আৰু এটা ডি.এছ.এল.আৰ. ।
বাঃ……………….. !!
সকলোকে নালাগিলেও বহুতকে লাগে । অৱশ্যে, তেওঁলোকৰ মাজতো ভাগ আৰু পাৰ্থক্য আছে । মই কেতিয়াও নকও বেয়া বুলি । ক’ব বিচাৰিছো প্ৰয়োজনীয়তাৰ কথা ।
কিছুমানক বিলাসিতাৰ বাবে, কিছুমানক লাগে ফটোগ্ৰাফীক ভাল পোৱাৰ বাবে, তাতে কোনোবাক আকৌ বাণিজ্যিক প্ৰয়োজনত ইত্যাদি । তাৰ মাজৰে মাত্ৰ কেইজনমানে ইয়াৰ সুন্দৰ প্ৰয়োগো কৰিছে য’ত আছে সম্ভাৱনা আৰু সৃষ্টিৰ এক মিঠা মাদকতা ; এইটো বৰ সুন্দৰ কথা । এনে সুন্দৰৰ পাছত দৌৰিবলৈকে নিজেও  দশক ধৰি বাজেট প্ৰায় মিলায়েই আছো  ।
     কিছুমানৰ আকৌ কথা শুনিলে আচৰিত হ’ব, হাতত ডি.এছ.এল.আৰ. লৈ ফুৰে অথচ ডি.এছ.এল.আৰ.-ৰ পূৰ্ণ পাঠ কি সুধিলে কব নোৱাৰে । কেমেৰাৰ বিষয়ে জনাটো দুৰৰেই কথা ।
তথাপি বাৰু ভাবিব পাৰি, লগৰ ল’ৰাক দেখিয়েই চখতে এটা ল'লে আৰু !
কিন্তু দুৰ্ভাগ্য এইখিনিতহে যে, এওঁলোকৰ বহুতে জানিবলৈ ইচ্ছাও নকৰে ।
আজি ১৯ আগষ্ট, বিশ্ব ফটোগ্ৰাফী দিৱস ।
সেই সূত্ৰে কেমেৰাৰ বিষয়ে কেইটামান প্ৰাথমিক তথ্য লৈ আহিছো । যদিওবা বহুতো কথা জানিবলগীয়া আছে, কিন্তু মোৰ নিজৰে সীমিত জ্ঞানৰ পৰিধি আৰু লিখিবৰ বাবে কেইবাখনো কিতাপ থকাৰ পাছতো মাত্ৰ কম সময়ৰ বাবে এই লেখা খুব চমুকৈ সমাপ্ত কৰিব লাগিব ।
প্ৰাৰাম্ভতে কৈ থওঁ, এই লেখাটোৰ বাবে মই তথ্য সংগ্ৰহ কৰিছো নগাঁৱৰ এগৰাকী সু-ফটোগ্ৰাফাৰ তথা ফটোগ্ৰাফী প্ৰশিক্ষক শ্ৰীযুত নৃপেন শইকীয়া ডাঙৰীয়াৰ ◄অসমীয়াত ফটোগ্ৰাফী► নামৰ কিতাপখনৰ পৰা ।
তেখেতলৈ আন্তৰিক ধন্যবাদ জ্ঞাপন কৰি আৰম্ভ কৰিছো কেমেৰা বিষয়ক দুটিমান তথ্যৰে এটি চুটি লেখা
                

                    “মাজনী লৈ আহিছো কেমেৰা”
                      ▬▬▬▬▬▬▬▬▬▬▬▬

           

            আজি বিশ্ব ফটোগ্ৰাফী দিৱস । আলোকচিত্ৰৰ জগতত ঘটা এটি ঘটনাৰ আধাৰত এই দিৱসটো প্ৰতি বছৰে ১৯ আগষ্ট তাৰিখে পালন কৰি অহা হৈছে । কিন্তু বেছি পাতনি মেলি কওঁ বুলি ৰাইজে কয় বাবে আজি মূল বিষয়লৈকে আহিছো ।অৱশ্যে মোক কথা বহলোৱাৰ বাবে গালি পাৰিলেও ক'মেই যে “ফটোগ্ৰাফী” শব্দটো গ্ৰীক ভাষাৰ দুটা শব্দ “ফট’জ” আৰু “গ্ৰাফী”-ৰ পৰা অহা । ফট’জ মানে পোহৰ আৰু গ্ৰাফী শব্দটোৱে অঁকা বুজাই । অৰ্থাৎ পোহৰৰ অংকনেই হৈছে “ফটো” । আৰু “ফটোগ্ৰাফী” বুলিলেটো মনলে আহে “কেমেৰা”-টোৰ কথা ।
     কেমেৰাৰ মূলতঃ দুটা অংশ থাকে । এটা বডী আৰু আনটো লেন্স ।
এই লেন্সৰ মাধ্যমত ছাঁ পোহৰৰ খেলত কেমেৰৰাৰ ভিতৰত সৃষ্টি হয় আলোকচিত্ৰ । পোহৰ ফটোগ্ৰাফীৰ প্ৰধান বিষয় । এজন ভাল ফটোগ্ৰাফাৰ হবলৈ লাগিব পোহৰ বিষয়ক নিখুঁত জ্ঞান । অ’ ফেচবুক জ্ঞান সম্ভাৰৰ মাননীয় সদস্য সকল, যি সকল কেমেৰাৰ সতে বিশেষ সম্পৰ্ক নাই তেখেতসকলেও কেতিয়াবা ফটোগ্ৰাফাৰ সকলে “এক্সপ’জাৰ” শব্দটো কোৱা শুনিছেই চাগে !ফটোগ্ৰাফীৰ ভাষাত ছাঁ-পোহৰৰ গোটেই ধাৰণাটোক “এক্সপ’জাৰ” বুলি কোৱা হয় ।
“এক্সপ’জাৰ”-ৰ সতে তিনিটা দিশ জড়িত হৈ আছে ↓

১) এপাৰচাৰ (Aperture)
২) চাটাৰস্পীড (Shutterspeed)
৩) আই. এচ. অ’. (ISO.)

এপাৰচাৰ (Aperture) : কেমেৰাৰ লেন্সখনত এটা ফুটা থাকে । ইয়াৰ মাজেৰে বাহিৰৰ পোহৰ কেমেৰাটোৰ ভিতৰত প্ৰৱেশ কৰে । সহজ ভাষাত সেইটোৱেই হৈছে এপাৰচাৰ (Aperture)যি কেমেৰাটোৰ ভিতৰলৈ প্ৰৱেশ কৰা বাহিৰৰ পোহৰক নিয়ন্ত্ৰিত কৰে । কেমেৰাটোত এপাৰচাৰ (Aperture) বঢ়াবলৈ বা কমাবলৈ ব্যৱস্থা থাকে । বেছি পোহৰত লেন্সৰ ফোটাটো কমাই বা সৰু কৰি লোৱা হয় আৰু কম পোহৰত লেন্সৰ ফুটাটো বঢ়াই বা ডাঙৰ কৰি লোৱা হয় । এপাৰচাৰ (Aperture)-ক ইংৰাজীৰ f বৰ্ণটোৰে বুজোৱা যায় । যেতিয়া পোহৰ বেছিলৈ থাকে তেতিয়া এপাৰচাৰ (Aperture)কমাই আৰু যেতিয়া পোহৰ কমকৈ থাকিব তেতিয়া এপাৰচাৰৰ পৰিমাণ বঢ়াই লোৱা হয় ।এপাৰচাৰৰ পৰিমাণ বুজাবলৈ f-ৰ পাছত নিৰ্দিষ্ট সংখ্যাটো লিখি প্ৰকাশ কৰা হয় যেনে, f/1.2, f/2, f/2.8, f/4, f/5.6, f/8, f/11, f/16 ।

 চাটাৰস্পীড (Shutterspeed) : চাটাৰস্পীড (Shutterspeed) বা এক্সপ’জাৰটাইম কেমেৰাটোত থকা এক অতি গুৰুত্বপূৰ্ণ কথা । 

এটা কেমেৰৰাৰ চেঞ্চৰৰ আগত এনে এখন পৰ্দা থাকে যি কেমেৰাটোৰ ভিতৰলৈ সোমাই যোৱা পোহৰক চেঞ্চৰত প্ৰতিবিম্বিত হবলৈ দাং খাই যায় আৰু চেঞ্চৰত পোহৰ গৈ পৰাৰ পাছত তাত আন পোহৰ নপৰিবৰ বাবে পুনৰ বন্ধ হৈ পৰে । এই পৰ্দাখনকে কোৱা হয় “চাটাৰ” (Shutter) আৰু কেমেৰাটোৰ যিটো বুটাম টিপিলে এই চাটাৰখন দাং খাই তাক কোৱা হয় “চাটাৰ বাট’ন” ।
এতিয়া কথা হ’ল পোহৰ কেমেৰাটোৰ চেন্সৰত পৰিবলৈ কিমান সময় খোলা থাকিব লাগিব সেইটোৱেই হৈছে 
চাটাৰস্পীড (Shutterspeed) ।

আই. এচ. অ’. (ISO.) : ফটোগ্ৰাফীত IMAGE SENSOR এক অটি গুৰুত্বপূৰ্ণ দিশ । ইয়াৰে আলোক-সংবেদনশীলতা বঢ়াব পাৰি । ISO. যিমানেই বাঢ়িব পোহৰৰ প্ৰতি কেমেৰাৰ চেঞ্চৰে বেছি সংবেদনশীল আৰু যিমানেই কমিব সিমানেই কম সংবেদনশীল হয় ।
ISO.-ক ISO.100, ISO.-200, ISO.400 ইত্যাদি সাংখ্যিক ৰূপৰে প্ৰকাশ কৰা হয় ।

আজিলৈ বাৰু বেছি নিলিখো । ফটোগ্ৰাফীৰ বিষয়ে জানিবলৈ বিভিন্ন কথা থাকিলেও ম’বাইলত পঢ়িবলৈ কিছু অসুবিধা। কেতিয়াবা এই বিষয়ে পুনৰ আলোচনা কৰাৰ আশা  হলে ৰাখিছো দেই ।
অ’ ৰ’ব, শেষত আমাৰ ই-ঠিকনাটোকে লিখি থৈ যাওঁ ।
আমাৰ ই-ঠিকনাটো হৈছে :

https://www.facebook.com/groups/372830512757409

                                            ☼ ধন্যবাদ ☼

                                      ফেচবুক জ্ঞান সম্ভাৰ

       🔆🔆🔹🔹🔹🔹📸🔸🔹🔹🔹🔹🔆🔆

💫 ৰাখী বন্ধন

✍

পৱিত্ৰ ৰাখী পূৰ্ণিমা 🌕

ভাষা আৰু সংস্কৃতি চিৰপ্ৰৱাহমান । ই কোনো ভৌগলীকতাৰ পৰিধি নামানে ; নামানে কোনো জাতি-বৰ্ণৰ পৃথকতা । সেয়ে, কোনো এটা জাতিৰ সাংস্কৃতিক উপাদান সমূহ  সেই জাতিৰ পৰা আন এটা জাতিলৈ গতিকৰা দেখা যায় । তেনে কাৰণতে পশ্চিমবঙ্গৰ বঙালী সকলৰ মাজত বিকাশ ঘটা পৱিত্ৰ "ৰাখী বন্ধন" উৎসৱটোৱে সমগ্ৰ ভাৰততে বিশেষ মৰ্যদা লাভ কৰি আহিছে ।

          আজি শাওনী পূৰ্ণিমা । ভায়েক বা ককায়েকক এই দিনটোত ভনীয়েকহঁতে ৰাখী বন্ধনৰে তেওঁলোকৰ মঙ্গল কামনা আৰু দীৰ্ঘায়ু কামনা কৰাৰ লগতে ভায়েকহঁত সকলো বিপদৰ পৰা ৰক্ষা পৰি থাকিবলৈ মানস কৰে । ভায়েক বা ককায়েক হঁতেও ভনীয়েকহঁতক সকলো বিপদৰ পৰা ৰক্ষা কৰাৰ প্ৰতিশ্ৰুতি প্ৰদান কৰে ।
এক সুন্দৰ ভাতৃপ্ৰেমৰ উদাহৰণ এই ৰাখী উৎসৱ । সঁচাই মহান ভাৰতীয় সংস্কৃতিৰ এক মহান উৎসৱ ।

        প্ৰচলিত নিয়ম মতে উৎসৱৰ আগদিনা বায়েক-ভনীয়েকহঁতে উপবাসে থাকি উৎসৱৰ দিনা ঘৰ-দুৱাৰ পৰিস্কাৰ কৰি ঘৰত গণেশৰ পূজা পাতে আৰু প্ৰথম ৰাখী বিঘ্নৰাজ গণেশলৈ অৰ্পণ কৰি পাছত ককায়েকৰ ভৰি ধুৱাই ধুপ-দীপৰে সন্মান কৰে আৰু কপালত চাউল আৰু চন্দনৰ ফোট দিয়ে ।
বিশ্বাস কৰা হয় এনে কৰিলে ককায়েকে সুস্থ দেহ লাভ কৰাৰ লগতে দীৰ্ঘায়ু হয় আৰু সকলো বিপদৰ সময়ত এই ৰাখীয়ে তেওঁক ৰক্ষা কৰে । এইখিনিতেই উল্লেখ কৰি যাওঁ ,ভাৰতীয় দৃষ্টিভংগীয়ে নাৰীকহে শক্তিৰ মূল বুলি গণ্য কৰি আহিছে আৰু সেয়ে শক্তিৰ উৎস হিচাপে হিন্দু শাস্ত্ৰ সমূহে দেৱতাৰ বিপৰীতে দেৱীকহে প্ৰতিষ্ঠা কৰিছে ।

   "ৰাখী উৎসৱ"ৰ বিষয়ে প্ৰাচীন শাস্ত্ৰত  উল্লেখ পোৱা যায় । এই উৎসৱৰ জন্ম কাহিনীটোৰ বিষয়ে জনাযায় এনেদৰে :

" শিৱপুত্ৰ বিঘ্নৰাজ গণেশে তেওঁৰ নিজৰ কোনো ভনী নথকাত এদিন মাক-দেউতাক হৰ-গৌৰীৰ ওচৰত দুখ কৰিলে । পুত্ৰৰ দুখ দেখি হৰ-গৌৰীয়ে মানস পুত্ৰী মা-সন্তোষীৰ আৱিৰ্ভাৱ ঘটাই তেওঁৰ হাতেৰে সূতাৰ ৰাখী পিন্ধাই ভাতৃ-ভগ্নীৰ সম্পৰ্ক গঢ়ি তুলিছিল ।"

     এইখিনিতে ফেচবুক জ্ঞান সম্ভৰৰ পাতত ৰাখীৰ  সৈতে জড়িত ইতিহাসৰ এক কাহিনী আগবঢ়াই সামৰিম :

ৰাজস্থানৰ মেৱাৰত এগৰাকী ৰাণী আছিল । ৰাণীৰ নাম আছিল 'কৰ্মৱতী' । সেই সময়ত বাহাদুৰ শ্বাহে তেওঁৰ ৰাজ্য আক্ৰমণ কৰিবলৈ সদলবলে অহাৰ কথা ৰাণীয়ে গম পাই মোগল সম্ৰাট হুমায়ুনৰ সহায় বিচাৰিলে আৰু তেওঁলৈ এডাল ৰাখী আগবঢ়ালে ।
হুমায়ুনে যদিওবা বাহাদুৰ শ্বাহকেইহে সহায় কৰিলে হেতেন তথাপি, ৰাখীৰ প্ৰতি সন্মান জনাই হুমায়ুন সেইবাৰ নিজে গৈছিল কৰ্মৱতীৰ ৰাজ্য ৰক্ষা কৰিবলৈ ।
কিন্তু দুৰ্ভাগ্য, হুমায়ুন গৈ পোৱাৰ আগতেই কৰ্মাৱতীয়ে জুইত আত্মজাঁহ দিলে ।
হুমায়ুনে কিন্তু নিজৰ কৰ্তব্য আৰু দায়িত্ব ৰাখিলে । বাহাদুৰ শ্বাহৰ আক্ৰমণৰ পৰা কৰ্মৱতীৰ ৰাজ্য ৰক্ষা কৰি হুমায়ুনে ভগ্নী প্ৰেমৰ এক মহান আদৰ্শ দাঙি ধৰিছিল।

      আদৰ্শ আৰু প্ৰেমৰ এনাজৰীৰ অধিক প্ৰাধান্যতাৰ বাবে এই উৎসৱে ক্ৰমাৎ জাতি-ধৰ্ম-আৰু ভাষাৰ তুলনাত্মক ঠেক পৰিসৰৰ পৰা মুক্ত হৈ আজি সমগ্ৰ ভাৰততে প্ৰধান্যতা লাভ কৰিছে ।

এই উৎসৱে আপোনাকো বিমল আনন্দ দিয়ক,

  সেই কামনাৰে ........
পৱিত্ৰ ৰাখী পূৰ্ণিমাৰ হিয়াভৰা ওলগ জনালোঁ।

✨  এই চমু লেখাটোৰ বাবে তথ্য সংগ্ৰহ কৰিছো বন্দিতা গোস্বামী শৰ্মাৰ ' বাৰে বৰণীয়া উৎসৱ ' নামৰ গ্ৰন্থখনৰ পৰা । লেখিকা গৰাকীক অশেষ ধন্যবাদ ।

🎤🔊 ফেচবুকত আমাৰ কৰাপাট✿ 

: https://m.facebook.com/groups/372830512757409?

         🔅🔹🔹🔸💠🔸🔹🔹🔅

১৫ আগষ্টৰ প্ৰসংগত

    ১৫ আগষ্টৰ প্ৰসংগত
💠🔸🔸🔸🔵🔸🔸🔸💠

কালিলৈ ১৫ আগষ্ট ।
আমাৰ দেশে এই বিশেষ দিনটোক "স্বাধীনতা দিৱস" নামেৰে পালন কৰিব । অৱশ্যে, ভাৰতৰ লগতে এই দিনটো "দক্ষিণ কোৰিয়া"-ৰো স্বাধীনতা দিৱস ।

চিপাহী বিদ্ৰোহৰ পাছত পোনপটিয়াকৈ ভাৰত শাসন কৰিবলৈ লোৱা ইংলেণ্ডে লাহে-লাহে অনুভৱ কৰিছিল যে ভাৰতত বাঢ়ি অহা ৰাজনৈতিক অস্থিৰতাৰ সমাধান কেৱল স্বাধীনতা ।  সেয়ে ১৯৪৭ চনৰ ফেব্ৰুৱাৰীত তেতিয়াৰ ইংলেণ্ডৰ প্ৰধানমন্ত্ৰী ক্লীমেন্ট এটলীয়ে প্ৰতিশ্ৰুতি দিছিল  ১৯৪৮ চনৰ ভিতৰত ভাৰতক স্বাধীনতা প্ৰদান কৰা হ'ব । কিন্তু ইয়াৰ কেইমাহমানৰ পাছতেই ভাৰতৰ তদানীন্তন ভাইচৰয় "লুইচ মাউন্টবেটেন"-ৰ পৰামৰ্শ আৰু অনুৰোধত ভাৰতৰ স্বাধীনতাৰ প্ৰক্ৰিয়াটো কিছু ক্ষিপ্ৰ কৰা হ'ল ।
ভাইচৰয় গৰাকীয়ে সেই সময়ত কংগ্ৰেছ আৰু মুছলীম লীগৰ মাজত বাঢ়ি অহা মতানৈক্যৰ বিষময় পৰিস্থিতিয়ে ভাৰতীয় ৰাজনৈতিক আৰু সামাজিক জীৱনত ভয়ংকৰ প্ৰভাৱ পেলাব পাৰে বুলি সন্দেহ কৰি ইংলেণ্ডক স্বাধীনতাৰ প্ৰক্ৰিয়াটো সোনকালে সম্পন্ন কৰিবলৈ অনুৰোধ জনাইছিল। ইমানেই নহয়, স্বাধীনতাৰ বাব "১৫ আগষ্ট"-ৰ দিনটোক তেওঁৱেই নিৰ্বাচনো কৰিছিল । 
তাৰো এক ঐতিহাসিক কাৰণ আছে ।
ফেচবুক জ্ঞান সম্ভাৰৰ মাননীয় সদস্য সকল, এই তথ্যৰ বাবে আগতীয়াকৈ মই কৃতজ্ঞতা জনাই লৈছো অসমীয়া ৱিকিপিডিয়াৰ পৰিয়ালবৰ্গক ।
যি কি নহওঁক, ভাইচৰয় মাউন্টবেটেনে ১৯৪৭ চনৰ "১৫ আগষ্ট" দিনটোকে ভাৰতীৰ স্বাধীনতাৰ বাবে উপযুক্ত দিন হ'ব বুলি ঠিক কৰিছিল ।
এই দিনটোত বিশ্ব ইতিহাসত আন এক বিশেষ ঘটনা সংঘটিত হৈছিল । এই দিনটোতে দ্বিতীয় বিশ্বযুদ্ধত জাপানে আত্ম-সমৰ্পন কৰিছিল আৰু ১৯৪৭ চনৰ "১৫ আগষ্ট" দিনটো সেই ঘটনাৰ আছিল দ্বিতীয় বাৰ্ষিকী ।

সকলোকে শ্ৰদ্ধা জনাই আজিলৈ সামৰিছো ।
নিশাটো সকলোৰে বাবে শুভ হওঁক !
                                  🌸 ধন্যবাদ ✨
                           
🎤🔊ফেচবুকত আমাৰ ঠিকনা📮
https://www.facebook.com/groups/372830512757409/
          🔅ফেচবুক জ্ঞান সম্ভাৰ🔅

📶 8⃣0⃣1⃣1⃣......

      💠🔸🔹⚫🔸🔹🔷🔹🔸⚫🔹🔸💠