Posts
১৮২৬ খ্ৰীষ্টাব্দত ইয়াণ্ডাবু সন্ধিৰে অসমক সাম্ৰাজ্যবাদী শোষণৰ ভিতৰুৱা কৰা বৃটিছ বাহিনীৰ চলনাৰ আগলৈকে অসমৰ ৰাজনৈতিক পটভূমি সম্পূৰ্ণ সুকিয়া আছিল । তাৰ আগলৈকে অসমত আহোম আৰু আন-আন ৰাজবংশ বিলাকৰ শাসন চলিছিল । সাত ৰাজ মাৰি এক ৰাজ কৰা আহোম স্বৰ্গদেউ সকলৰ বলিষ্ঠ শাসন অসম বুৰঞ্জীত কাললৈ এক গৌৰৱোজ্বল সময় । বিশ্ব বুৰঞ্জীৰেই এক নজিৰ বিহীন ঘটনা কিয়নো, সমগ্ৰ বিশ্বৰ পটভূমিত এনে এক ৰাজবংশ নোলাব যি এখন দেশত ৬০০ বছৰৰ দৰে এক সুদীৰ্ঘ সময় ৰাজপাট অধিগ্ৰহণ কৰিব পাৰিছে । একমাত্ৰ আহোমসকল ; আনক বুজি সম্প্ৰীতিৰে আৰু প্ৰয়োজনত হেংডাঙ লৈও শাসন কৰিব জনা গুণৰ বাবেই এই ৰাজবংশটোৱে সকলোকে আপোন কৰি জনতাক জয় কৰিব পাৰিছিল ।
ক্ৰম নং---- স্বৰ্গদেউ সকল ----ৰাজত্ব কাল
১ চুকাফা ১২২৮-১২৬৮
ইয়াৰো কাৰণ আছে । যদিওবা সমূহ আহোম ৰজাকেই "স্বৰ্গদেউ" বুলি সম্বোধন কৰা হয় বা কৰিব পাৰি তথাপি এটা কথা উল্লেখ কৰি যোৱা ভাল হ'ব যে চুকাফাৰ দিনত বা তেখেতৰ পাছৰ কেইবাজনো ৰজালৈকে "স্বৰ্গদেউ" সম্বোধনটো গ্ৰহণ কৰা হোৱা নাছিল । সম্ভৱতঃ চুহুংমুঙ স্বৰ্গদেউ বা দিহিঙ্গীয়া ৰজাৰ দিনৰে পৰা আহোম ৰজা সকল "স্বৰ্গদেউ" হিচাপে পৰিচিত হ'বলৈ ল'লে । স্বৰ্গদেউ চুহুংমুঙৰ দিনতে লিখা "শ্ৰী শ্ৰী স্বৰ্গনাৰায়ণ মহাৰাজৰ জন্ম কথা" নামৰ বুৰঞ্জীখনৰে আহোম স্বৰ্গদেউ সকলক স্বৰ্গৰাজ ইন্দ্ৰৰ সতে সম্পৰ্ক দেখুৱাই তেখেতৰ পাছৰে পৰা এই অভিধা ব্যৱহাৰ হোৱা বুলি জনা যায় । উল্লেখযোগ্য যে এইজনা স্বৰ্গদেউৰ দিনৰে পৰাই আহোম স্বৰ্গদেউ সকলে একোটাকৈ হিন্দু নামো গ্ৰহণ কৰা দেখা যায় । সেই মৰ্মে স্বৰ্গদেউ চুহুংমুঙে "স্বৰ্গ নাৰায়ণ" নাম গ্ৰহণ কৰিছিল । আহোম ৰাজ-শাসনত "বৰপাত্ৰ গোহাঁই" পদৰ সৃষ্টি এখেতৰ দিনতে হোৱা । এখেতৰ দিনতেই মহাপুৰুষ শ্ৰীমন্ত শংকৰদেৱে অসমত নৱ-বৈষ্ণৱ ধৰ্ম প্ৰচাৰ কৰে ।
➖➖➖➖➖
ঘটনাবহুল অসম বুৰঞ্জীত ১৬০৩ খ্ৰীষ্টাব্দৰ পৰা ১৬৭৩ খ্ৰীষ্টাব্দলৈ এই সময়ছোৱা সংঘৰ্ষৰে ৰক্তাক্ত সময় । মোগলৰ দীঘলীয়া অসম আক্ৰমণ আৰু আহোমৰ বাৰম্বাৰ প্ৰতিহত কৰাৰ প্ৰচেষ্টাত এখনৰ পাছত আন এখন যুদ্ধই অসম বুৰঞ্জী কঁপাই তুলিছিল । স্বৰ্গদেউ প্ৰতাপ সিংহৰ দিনৰ পৰা স্বৰ্গদেউ উদয়াদিত্য সিংহলৈকে এই দীঘল সময়ছোৱাত ঘটা যুদ্ধত অসমক ৰক্ষা কৰাত আহোমৰ অগ্নিপৰীক্ষা বুৰঞ্জীৰ পাতত এক বিশেষ অধ্যায় । যুদ্ধৰেই হওঁক বা চলে-বলে-কৌশলে যেনেকৈয়ে নহওঁক ভাৰত বিজয়ী মোগলৰ হাতৰ পৰা অসম ৰক্ষা কৰাটো ইমান সহজ কথাও নাছিল । তথাপি অদমনীয় আহোমৰ ৰাজনীতি, যুদ্ধনীতিয়ে মোগলক যে বাৰুকৈয়ে এশিকনী দিছিল সেয়া বুৰঞ্জীৰ পাতত জিলিকা কথা । আহোম সেনাৰ বীৰত্বক আনহে নালাগে মোগল সেনাপতি স্বয়ং ৰামসিংহয়ো প্ৰশংসাৰে উপচাই গৈছে । (🔴 লগতে পঢ়ক : https://m.facebook.com/groups/372830512757409?view=permalink&id=2585534221487016 )
এইখিনিতেই উল্লেখযোগ্য যে স্বৰ্গদেউ প্ৰতাপসিংহৰ দিনতেই মোমাই তামুলী বৰবৰুৱাই দেশৰ অৰ্থনীতিত প্ৰভাব পেলোৱা বিখ্যাত "পাইক প্ৰথা" আৰম্ভ কৰিছিল ।
১৬৬২ চনত জয়ধ্বজ সিংহৰ দিনতে মিৰজুমলাৰ অসম আক্ৰমণ ঘটে । এই আক্ৰমণত আহোমসকলৰ পৰাজয় আৰু মিৰজুমলাৰ গড়গাঁও দখল এক উল্লেখযোগ্য ঘটনা । এই আক্ৰমণত স্বৰ্গদেউ জয়ধ্বজ সিংহই পলায়ন কৰা ঘটনাৰ বাবে অসম বুৰঞ্জীত এখেত "ভগনীয়া ৰজা" নামৰেও পৰিচিত । পিচত অৱশ্যে সন্ধি হয় আৰু সন্ধি অনুসৰি ব্ৰহ্মপুত্ৰৰ উত্তৰ পাৰে ভৰলী আৰু দক্ষিণে কলং নৈলৈকে আহোমৰ সীমা নিৰ্ধাৰণ হয় । মিৰজুমলাৰ এই আক্ৰমণৰ সময়ত লগত অহা পৰিব্ৰাজক "চিহাবুদ্দিন তালিচ"-ৰ টোকাৰ পৰা সেই সময়ৰ অসমৰ বিষয়ে বহু কথা জানিব পাৰি ।
জয়ধ্বজ সিংহৰ পাছত স্বৰ্গদেউ চক্ৰধ্বজ সিংহৰ দিনতো অসমৰ আকাশ-বতাহ যুদ্ধৰে অস্থিৰ হৈ পৰিছিল । এখেতৰ দিনৰে বিখ্যাত "শৰাইঘাটৰ ৰণ"-ৰ (১৬৭১)কথা মনত পৰিলে আজিও অসমীয়াৰ তেজ গৰম হৈ আহে । এই যুঁজত লাচিতৰ দুৰ্দান্ত সাহস আৰু পৰাক্ৰমৰ কথা কোনে নাজানে ( 🔴 লগতে পঢ়ক : https://m.facebook.com/groups/372830512757409?view=permalink&id=1769877136386066 )
উদয়াদিত্য স্বৰ্গদেউৰ পাছত কেইবাগৰাকী স্বৰ্গদেউ ৰাজপাতলৈ আহিলেও উল্লেখযোগ্য আন এজন স্বৰ্গদেউ হৈছে "গদাধৰ সিংহ" । আহোমৰ আন্তঃ বিপ্লৱৰ অন্ত পেলাই শিঙৰি-ঘৰত উঠা এখেতৰ দিনতেই আহোম আৰু মোগলৰ শেষ যুদ্ধ বিখ্যাত "ইটাখুলি ৰণ" হৈছিল ১৬৮২ খ্ৰীষ্টাব্দত । এই ৰণতে আহোমৰ শেষ সীমা পশ্চিমে মানাহা নৈ লৈকে নিৰ্ধাৰিত হয় । এইজনা স্বৰ্গদেউৰ পাছত তেখেতৰ সু-যোগ্য পুত্ৰ ৰূদ্ৰসিংহ ৰাজপাটত বহে । ১৭১৪ খ্ৰীষ্টাব্দত তেখেত স্বৰ্গী হোৱাত শিৱসিংহ ৰাজপাটলৈ আহে আৰু অতি অন্ধবিশ্বাসী হোৱাৰ গুণে তেখেতৰ শাসন ভাৰ পত্নী ফুলেশ্বৰী কুঁৱৰীয়ে নিজ হাতলৈ আনি ভুল সিদ্ধান্তৰে দেশৰ ৰাজশক্তিক দুৰ্বল কৰি তোলে । "মোৱামৰীয়া বিদ্ৰোহ" ইয়াৰ উদাহৰণ আৰু এই বিদ্ৰোহ আহোম ৰাজ শাসন ধ্বংসৰ অন্যতম এটি মূল কাৰক । এই বিদ্ৰোহৰ পাছতেই আন-আন বিভিন্ন বিদ্ৰোহে দেশৰ ৰাজনীতিক অস্থিৰ কৰি তুলিছিল, কেইবাটাও শতিকাৰ গৌৰৱৰ দিনবোৰক চমু চপাই আনিছিল আৰু পাছত আহোম শক্তিক দুৰ্বল কৰি সময়ে অসমক লৈ গৈছিল ১৮২৬ সেই ক'লা দিনবোৰলৈ ।
ধন্যবাদ 🙏
