Posts
ইমান অত্যাচাৰ !
নষ্টজোৱা, হতশ্ৰীহোৱাবোৰৰ পৰা সঁচাই শান্তি নোহোৱা হৈছেগে । নাপায়, ইমান অত্যাচাৰী হ'বগে নালাগে । যিহে অত্যাচাৰ হৈছে, যি বুলিয়েই গালি নিদিও তাকো কম হয় । বাপৰে...শান্তি-সুখ সময়ে নোহোৱা কৰি দিয়ে ।
মতাকেইটা বাৰু যেন-তেন, মাইকীবোৰ যে ; কি ক'ম আপোনাক, এনেহে লাগে যেন ইহঁততকৈ ভয়ানক আন কোনোৱেই নাই !
খাওতেটো খাবই তাকে যেন সুধি-সুধিহে খাব ! তাকো এবাৰ নহয়, বাৰে-বাৰে সেই একেটাই প্ৰশ্ন, "কোন...কোন...কোন ❓️❓️❓️"
হেৰৌ মই...মই...মই , মই ৰাজীৱ গোস্বামী । মৰাহঁত, তহঁতৰ কিমান শ গোষ্ঠীৰ আগৰ মাতামহীবোৰেও এনেকৈয়ে মোক খায় তহঁতৰ পূৰ্ব-পুৰুষসোপাক জন্মদি সিহঁতৰ পৰা আকৌ তহঁতক পৃথিৱীবাসীক উৎপিৰণ চলাবলৈকে দায়িত্ব দি থৈ গৈছে । হেৰৌ, এতিয়া মোকেই চিনি নোপোৱা হ'লিনে ধাৰখোৱাহঁত ?
ক'তনো পাবি অন্ধলাহঁত, ভালকে চকুৰে মনিব নোৱাৰ বুলি পাহৰিছিলোৱেই ৰ । ভালকে চকুৰে মনিব নোৱাৰোতেও তহঁতৰ অত্যাচাৰত মানুহ থাকিব নোৱাৰা অৱস্থা, তাতে যদি চকুৰে ভালকে দেখিলি হেতেন তেন্তে আমাৰ যে কি হ'ল হয় ভগৱানেহে জানে ।
গৰমৰ দিনকেইটা সোমাবহে লাগে শীতনিদ্ৰাৰপৰা (HIBERNATION) উঠিয়েই আক্ৰমণকাৰীবোৰৰ অত্যাচাৰ আৰম্ভ হৈয়েই যায় ।
কম অত্যাচাৰ কৰনে, পাৰোতেনো WHO-এ বিশ্বৰ ভিতৰত আটাইতকৈ ভয়ানক জীৱবোৰৰ তালিকাৰ প্ৰথম দহটা স্থানৰ ভিতৰত তহঁতক ৰাখেনে ! কটা নিধকৰ জাত, লাজপোৱা নাই ? সাধাৰণ অত্যাচাৰবোৰ বাদেই দিছো, ইহঁতৰ কাৰণেই প্ৰতি বছৰে বিশ্বত প্ৰায় ৭,২৫,০০০ জন মানুহ মৃত্যুৰ মুখত পৰে ।
থে...পে...চ, বধিলো এটাক ।
অন্ততঃ এগাল-এগাল কণীপৰা এইসোপাৰ এজনীক বধিলেও ভৱিষ্যতৰ আক্ৰমণকাৰীৰ সংখ্যা কমাত সহায়ক হয় । এইসোপাই কণীও কম নাপাৰে । এজনীয়ে জীৱনকালত এবাৰেই কণী পাৰে । হ'লে কি হ'ব, এবাৰতে দুশৰ পৰা তিনিশমান যদি কণীয়েই পাৰে তেন্তে সেই কণীবোৰৰ পৰা কিমান আক্ৰমণকাৰী এই ধৰাধামলৈ আহিব পাৰে ভাবক । অৱশ্যে মাছ-ভেকুলী আদি প্ৰাণীবোৰে এই কণীবোৰ খায় আমাক দয়া কৰিছে বাবে অলপমান হ'লেও বাচি আছো ; নহলে, যি ফালে চকু দিব সেইফালেই এইসোপাকে দেখিলে হয় ।
ঠাণ্ডাৰ দিনবোৰ ভাললগাৰ প্ৰথম কেইটামান কাৰণৰ ভিতৰত এইচবৰ অনুপস্থিতি এটা । মৰাহঁতে ঠাণ্ডা সহিব নোৱাৰে বাবে শীতৰ দিনবোৰত শীতনিদ্ৰা কৰি অলপ গৰম নামিলেই ওলাই আহি অত্যাচাৰ আৰম্ভ কৰে । ভগৱানেও যেন পৃথিৱীবাসীক উৎপিৰণ চলাবলৈ ঠিকাটো ইহঁতকেই দিছে ।
সৰু প্ৰাণী, সাধাৰণতে আমি দেখি থকাবোৰ অতি বেছি ছয় মিলিমিটাৰমান দীঘল হ'ব । ছটা নোমাল ঠেং আৰু এযোৰ পাখিৰে সৰু এই পতংগবিধে মানুহক অতিষ্ঠ কৰি তোলে । আমাৰ ইয়াতেই ইমান অতপালি, আফ্ৰিকাৰ দৰে দেশবোৰত এই পতংগবিধৰ অত্যাচাৰ আৰু বেছি । কেৱল অত্যাচাৰেই নহয়, ঘাতক ৰূপে ইহঁতৰ কিছুমান প্ৰজাতিয়ে প্ৰতি বছৰে লাখ-লাখ মানুহক হত্যা কৰি আহিছে ।
সেয়ে ভাবিলো, ইমান আপদিয়া এই জীৱবিধৰ বিষয়ে ফেচবুক জ্ঞান সম্ভাৰ facebook Gyan Sambhar ত দুআষাৰ লিখা ভাল হ'ব । সেয়ে আজিৰ শিতানত আগবঢ়াইছো জীৱকুল মাজত সন্ত্ৰাসৰ সৃষ্টি কৰা আতংকৰ এটি অন্য নাম "মহ"-ৰ বিষয়ে দুআষাৰ ।
"মহ" 🦟
আন্টাৰ্টিকাক বাদ দি বিশ্বৰ কেউখন মহাদেশতে নিজা স্বভাৱৰে সন্ত্ৰাসৰ পোহাৰ মেলি মানুহক অতিষ্ঠ কৰি ৰখা আপদীয়া মহবোৰক বাৰু কোনে নিচিনে । কেৱল একেটা প্ৰশ্নকেই যেন মুখতে লৈ পৰিচয় হ'বলৈ বিনা নিমন্ত্ৰণে আগবাঢ়ি আহি থাপৰত চিৰনিদ্ৰা যোৱা এই অকণমানি অথচ ভয়ানক প্ৰাণীবিধেই হৈছে মহ । পতংগ জগতৰ শুনিবলে একেবাৰে মন নোযোৱা আৰু আপোনাৰ চিকুণ টোপনিৰ ঘোৰ শত্ৰু এইবিধ প্ৰাণীৰ ইংৰাজী নাম "MOSQUITO" । স্পেনীচ ভাষাৰ শব্দ "MOSCA"- ৰ পৰাই শব্দটোৰ সৃষ্টি হোৱা বুলি জনা যায় । Little fly বুজাবলৈ স্পেনীচ ভাষাত "মস্কা" শব্দটো ব্যৱহাৰ কৰা হয় । আনহাতে বৈজ্ঞানীক নামাকৰণৰে মহক "Culicidae" বুলিহে জনা যায় । Culicidae শব্দটো আকৌ আহিছে লেটিন ভাষাৰ পৰা আৰু ইয়াৰ অৰ্থটো হৈছে "তেজ খোৱা এবিধ কীট" ।
সমগ্ৰ বিশ্বতে মহৰ প্ৰায় ৩,৫০০ টামান প্ৰকাৰ পোৱা যায় । এইবোৰ "Culicidae" (কিউলিচিডি) পৰিয়ালৰ অন্তৰ্গত । ইহঁতবোৰে উৰোতে ছেকেণ্ডত প্ৰায় ৫০০ বাৰমান পাখি জোকাৰাৰ ফলত এক বিৰক্তিকৰ "কোণ-কোণ"-কৈ এক শব্দ হয় । মানুহৰ ঘাম, চুলিৰ গেলেপা গোন্ধ, কাৰ্বন ডাই-অক্সাইড আদিৰ ঘ্ৰাণ মহৰ অতি প্ৰিয় । আনহাতে কাণৰ ভিতৰত থকা কণামাকুৰিৰ গোন্ধও মহে ভালপায় । তীব্ৰ ঘ্ৰাণেন্দ্ৰিয়ৰ সহায়ত ইহঁতে সেয়ে কাণৰ ওচৰত আহি উৰি-ফুৰি কুণ-কুণনিৰ সৃষ্টি কৰে । ইহঁতৰ ঘ্ৰাণেন্দ্ৰিয় যিমানেই শক্তিশালি তাৰ বিপৰীতে দৃষ্টিশক্তি কিছু দুৰ্বল । আন্ধাৰতো মহে ইয়াৰ ঘ্ৰাণশক্তিৰ সহায়ত সহজতে মানুহ বা জন্তুৰ ওচৰ চাপি আহিব পাৰে।
আপুনি জানি আচৰিত হ'ব যে জীৱৰ তেজশোহা বুলি ভবা এই প্ৰাণীবিধৰ মূল আহাৰ কিন্তু তেজ নহয় । বিভিন্ন গছৰ পৰা পোৱা ৰসহে মহৰ প্ৰকৃত আহাৰ । আপুনি বাৰু জানেনে, মতা মহে তেজ নুশোহে । ইহঁতে ফুল-ফল-পাত 🌸🌿 আদিৰ ৰস খায়েই জীয়াই থাকে । প্ৰাণীৰ তেজ খায় মাত্ৰ মাইকী মহবোৰে । কণী পাৰিবলৈ প্ৰয়োজন হোৱা প্ৰটিনৰ বাবে মাইকী মহে 🦟 তেজ শোহে আৰু এই তেজৰ সহায়তে কণীৰ বিকাশ ঘটাই জলাশয়ত কণী পাৰে ।
আন এটা কথা জানি আচৰিত হ'ব যে ইষ্ট্ৰ'জেন নামৰ হৰ্মনবিধ পুৰুষতকৈ মহিলাৰ দেহত অধিক পৰিমাণে থাকে আৰু এইবিধ হৰ্মণে মহক বেছিকৈ আকৰ্ষিত কৰে বাবে মতা মানুহতকৈ মহিলাকহে মহে বেছিকৈ আক্ৰমণ কৰে ।
মহে ইহঁতৰ মুখত থকা শুঙৰ (Proboscis) সহায়ত মানুহ বা জন্তুৰ দেহৰ পৰা তেজ শোহি খায় । শোহাৰ সময়ত ইহঁতৰ মুখৰপৰা ওলোৱা এবিধ লালটিৰ বাবে মহে কামোৰা ঠাইখিনি খজুৱাই । এই লালটিবিধত প্ৰ'টিন আৰু এনটি-ক'এগুলেণ্ট (Anticoagulant) থাকে যি তেজ মখনা বন্ধাত বাধা দিয়ে । মহৰ এই লালটিবিধক আমাৰ শৰীৰে প্ৰতিক্ৰিয়া কৰে বাবে মহে কামুৰিলে খজুৱাই । তাতোকৈও মোৰ বেছি অশান্তি লাগে মহ মাৰিলেই হাতত লগা তেজৰ বাবে । আপোনাৰো বাৰু হয়নে ? তেজখায় থকা মহ এটাক থাপোচকে থপৰিয়াই মাৰোতেই মহৰ পেট ফালি হাতত লাগি যোৱা তেজ বৰ অশান্তিদায়ক । ৰাক্ষসীসোপাই অলপ তেজ খালে হেঁপাহেই নপলাই । তেজ খায় গেৰেলা-গেৰেল হোৱাৰ পাছতো আৰু অলপ তেজ খাবলৈ থকা সিহঁতৰ ৰক্তপিপাসু মনটোৰ বাবে পেট ফালি তেজ ওলাও-ওলাও🦟 হৈ পৰে । তেনেতে যদি মহক থপৰিয়ালে ; চাবোনৰে হাত ধুৱাতহে বল ।
পতংগতত্ত্ববিদসকলে (Entomologist) ক'ব বিচাৰে যে এজনী মহে নিজৰ শৰীৰৰ ওজনতকৈ তিনিগুণ বেছি তেজ শোহে আৰু দুই-তিনিদিনলৈ অনাহাৰে থাকে । এইখিনি সময়ৰ ভিতৰত তেজ হজম কৰাৰ লগতে তেজৰ সহায়ত কণীৰ বিকাশ ঘটায় আৰু পানীত কণী পাৰে । কণীৰ পৰা এটা প্ৰাপ্তবয়স্ক মহলে পৰিণত হোৱাৰ এই সময়খিনিত মহে 🦟জীৱনৰ মুঠ চাৰিটা স্তৰ স্পৰ্শ কৰে
১/কণী ২/পলু ( Larva) ৩/Pupa ৪/ প্ৰাপ্তবয়স্ক মহ 🦟।
মহৰ জীৱনকাল বৰ দীঘলো নহয় । এসপ্তাহ-দহদিনৰ পৰা এমাহৰ ভিতৰতে ইহঁতে জীৱন সমাপ্ত কৰে আৰু এইখিনি সময়তে অত্যাচাৰৰ গুৰুদায়িত্ব দিবলৈ শ-শ বংশধৰক এই পৃথিৱীত জন্ম দি যায় । অৰ্থাৎ, সৰু কালতেই আপোনাৰ তেজখায় জন্মদিয়া মহৰ হাজাৰ-হাজাৰ পাছৰ প্ৰজন্মইহে আজি আহি আপোনাকে আকৌ আক্ৰমণ কৰি তেজ সংগ্ৰহ কৰিছে আৰু সেই তেজৰে কণী পাৰি আপোনাক ভৱিষ্যতলৈকো অশান্তি দিবলৈ ইহঁতবোৰ সংকল্পবদ্ধ ।
তেজখোৱাহঁতে তেজৰ বাবে কাষলে আহি কৰা সীমাহীন উপদ্ৰৱ আৰু অত্যাচাৰৰ কথা বাৰু বাদেই দিলো তাতোকে ডাঙৰ কথা হৈছে মহৰ পৰা হোৱা কিছুমান ভয়ানক-ভয়ানক বেমাৰ ।
মেলেৰিয়া, ডেংগু, পাণ্ডু-জ্বৰ, জাপানীজ এনকেফেলাইটিছ, চিকুংগুনিয়া, জিকা আদি মাৰাত্মক বেমাৰৰ ভাইৰাচ কঢ়িওৱা বাহক মহবোৰৰে কিছুমান প্ৰজাতি । অৱশ্যে সকলো মহৰ কামোৰৰ কাৰণে এনে বেমাৰবোৰ নহয় । কিছুমান বিশেষ প্ৰজাতিৰ মহে এনেধৰণৰ ভয়ানক ৰোগ বিয়পায় । আমি সকলোৱেই মাইকী এনোফিলিছ মহৰ কথা শুনিছো । মাইকী এনোফিলিছ মহৰ কামোৰৰ পৰা মেলেৰিয়া ৰোগ বিয়পে । এনোফিলিছৰো আকৌ ৫০০ টামান উপভাগ আছে । তাৰে ৩০ টা বিপদজনক আৰু ইয়াৰে ৩টা অধিক বিপদজনক । এইকেইটা হ'ল 🦟"এনোফিলিছ গাম্বিয়া" 🦟"এনোফিলিছ ক'লুজি" আৰু 🦟"এনোফিলিছ আৰাবিয়েন্সিছ" । এই তিনিটা উপ-প্ৰজাতিৰ মাইকী মহৰ পৰা মেলেৰিয়া ৰোগ বিয়পে । উল্লেখযোগ্য যে এনোফিলিছ মহে সন্ধিয়া আৰু ৰাতি কামোৰে ।
আন এবিধ ভয়ানক মহ হৈছে🦟 "কিউলেক্স মহ" । জাপানীজ এনকেফেলাইটিছৰ বাহক । তেনেদৰে "ডেংগু" "পাণ্ডুজ্বৰ" "চিকুংগুনিয়া" "জিকা" আদি ৰোগৰ বাহক হ'ল 🦟এডিচ এজিপ্ট আৰু🦟 এডিচ এলব'পিকটাচ মহ । জানি থোৱা ভাল যে এডিচ মহে সাধাৰণতে দিনত কামোৰে আৰু স্থিৰ চাফা পানীত কণী পাৰে । আন্ধাৰ কোঠা, বিচনা-আলমিৰা আদিৰ তলত ইহঁতবোৰ লুকাই থাকে । গতিকে এনেবোৰ স্থান সদায় পৰিষ্কাৰ কৰি ৰখাৰ লগতে ঘৰৰ ওচৰে-পাজৰে ক'তো পানী জমা হৈ থাকিবলে দিবই নালাগে । দিনত শোলেও আঠুৱা তৰি শোৱাৰ অভ্যাস কৰিলে মহৰ আক্ৰমণৰ পৰা কিছু হাত সাৰিব পাৰি ।
এইখিনিতে এটা কথা মনলৈ আহিছে । কিছুমান মহ একাধিক বেমাৰ বিয়পোৱাৰ বাবে দায়ী । এতিয়া প্ৰশ্ন হ'ল, এনে এটা মহে এবাৰ কামুৰি একাধিক বেমাৰ এজন ব্যক্তিৰ শৰীৰত দিব পাৰেনে ?
এই সন্দৰ্ভত "বিশ্ব স্বাস্থ্য সংস্থা"-ই ২১ চেপ্তেম্বৰ ২০১৬ ত প্ৰকাশ কৰা এক তথ্য অনুসৰি একেটা কামোৰতে দুটা বেমাৰ এজন ব্যক্তিৰ শৰীৰত সোমোৱাটো সম্ভৱ হ'ব পাৰে ।
ম'হৰ পৰা হোৱা এনেবোৰ ভয়ানক বেমাৰৰ বাবেই মহক বিশ্বৰ দহবিধ ভয়ানক জীৱৰ তালিকাৰ প্ৰথম দহটা স্থানত অন্তৰ্ভুক্ত কৰা হৈছিল (খুব সম্ভৱ তৃতীয় স্থান) ।
বাৰিষা অহাৰ লগে-লগে মহৰ প্ৰজনন অধিক মাত্ৰাত বৃদ্ধি হয় । বিশেষকৈ ক্ৰান্তিয় আৰু ক্ৰান্তিয়-নাতিশীতোষ্ণ অঞ্চলবোৰত মহৰ উপদ্ৰৱ অধিক । এইক্ষেত্ৰত মহৰ পৰা বাচিবলৈ চৰকাৰে প্ৰতি বছৰেই জন-জাগৰণ চলাই যোৱাও দেখা যায় । ৰাইজ সতৰ্ক হওক, সাৱধান হওক । মহক বৰ সাধাৰণ ভাৱেৰে ন'লব । আপুনি জানেনে, যে মহৰ পৰা সাৱধান হ'বৰ বাবে জন-জাগৰণৰ উদ্দেশ্যে আৰু ছাৰ ৰ'ণাল্ড ৰ'চৰ স্মৃতিত প্ৰতি বছৰৰ ২০ আগষ্ট তাৰিখটোক "বিশ্ব মহ দিৱস" নামেৰে পালন কৰা হয় । ১৮৯৭ চনত ৰ'ণাল্ড ৰ'চে হেনো মাইকী এনোফিলিচ মহৰ কাৰণে "মেলেৰিয়া" ৰোগ হয় বুলি আৱিষ্কাৰ কৰিছিল ।
নাজানো আৰু কিমান সঁচা কথা ! আমি জনাত হাজাৰ বছৰৰ আগতেই দেখোন ভাৰতত চৰক মুণিয়ে "চৰক সংহিতা"-ত এই বিষয়ে লিখি থৈ গৈছিল। সেইফালৰ পৰা "বিশ্ব মহ দিৱস"-টো ইংৰাজ চিকিৎসক ছাৰ ৰ'ণাল্ড ৰ'চৰ নামত পাতিব লাগিছিল নে মহান ভাৰতীয় আয়ুৰ্বেদ গুৰু চৰক মুণিৰ নামত পাতিব লাগিছিল ; মনলে অহা এটা ডাঙৰ প্ৰশ্ন !??
শেষত আন এটা সততে মনলৈ অহা ডাঙৰ প্ৰশ্নৰে আজিৰ এই প্ৰবন্ধ সামৰিম । কোৱা হয় ভগৱানৰ সৃষ্টিত প্ৰতিটো প্ৰাণীৰেই একো-একোটা কাম পৃথিৱীত আছে । তেনেহ'লে তেজখোৱা এই নৰকী মহসোপাৰ কি কাম ? কেৱল মানুহ আৰু আন প্ৰাণীৰ তেজখোৱা, বেমাৰ বিয়পোৱা, এগাল-এগালমান কণী পৰা এইবোৰেই নেকি ? কথাটো ভাবিবচোন । সঁচাই মহো কিবা কামত আহেনেকি ?? এইটোও এক গুৰুত্বপূৰ্ণ চিন্তা !
মহো প্ৰকৃতিৰাণীৰ কামত খাটে ; কেনেকৈ কওঁনে ?
এই পৃথিৱীত খাদ্যৰ কাৰণে জীৱবোৰে এটাৰ ওপৰত আনটো নিৰ্ভৰ কৰিবই লাগে । এইটো প্ৰকৃতিৰ নিয়ম । তেনে দৃষ্টিৰে মহে খাদ্য-শৃংখলাক চলাই ৰখাত বিশেষ ভূমিকা গ্ৰহণ কৰে । এই মহবোৰ আৰু ইয়াৰ কণী মাছ, ভেকুলী আদি বিভিন্ন জলচৰ-উভচৰ-স্থলচৰ কিছুমান প্ৰাণীৰ বৰ প্ৰিয় খাদ্য । আপোনাৰ ঘৰখনতেই মন কৰিবচোন, দেখিব জেঠিটোৱেও সময়ে আহাৰৰ কাৰণে মহৰ আশ্ৰয় লৈছে । সেইদৰে বিভিন্ন সৰু-সৰু প্ৰাণীয়েও মহক খায় ক্ষুধা নিৱাৰণ কৰে । এনেদৰে খাদ্য-শৃংখলাৰ চক্ৰত মহৰো এই পৃথিৱীত কাম আছে ।
হ'লেও মই নাথাকিম আৰু বুজিছে । বৌটি, পেহিটি, দদাইটিহঁত ঔ ; মোক আৰু তহঁতে দেখা নাপাবিহঁত অ' ! যামগে আও ..., নাথাকো ইয়াত মহৰ কামোৰ খায় 🦟🦟 । আন্টাৰ্টিকাত বোলে এটাও মহ নাই । মই তালেকে যাম । পেংগুইনৰ 🐧 সতে ধেমালি কৰিয়েই জীৱন কটাম । নাথাকো ইয়াত, পাৰ যদি কাবৌ-মিনতি কৰি হ'লেও ৰাখ যদি মোক ৰাখ ...
ধন্যবাদ
শুভৰাত্ৰি
☼ আমাৰ ফেচবুক ঠিকনা 📬
আমাৰ📧 facebookgyansambhar@gmail.com
◀🔸🔸🔸🔴🔹🔹🔹▶
No comments:
Post a Comment