Posts
এইকেইদিন খুব ভাল লাগিল । ৰজাই সঁচাই মজা দিলে ; ভালপালো ! ইমানকে আনন্দ পাম বুলি মই আশা কৰা নাছিলো, কিন্তু পাইগ'লো । অৱশ্যে, বাহিৰৰ হলে কথাটো অলপ বেলেগ কিন্তু, আমাৰ স্থানীয় ৰজাৰপৰাও যে এনে আনন্দ পাব পাৰি তাকো অফুৰন্ত ভাৱে, সেইটোহে ক'ব বিচাৰিছো । ঠিকেই, ৰজা ৰজায়েই ! আচলতে মই পোৱা এনে সুবিধা সকলোৱে পাবলৈ কিন্তু ভাগ্যও লাগিব ! সেয়ে কপালৰ ফেৰত দক্ষিণ শালমৰালৈ আহি ইয়াত পোৱা ৰজাৰ সোৱাদ এইবাৰ মই ভালকৈয়ে উপভোগ কৰিছো । 
ৰজাৰ পৰা পোৱা এই আনন্দত কৃতজ্ঞতাৰে উপচি উঠিছে হৃদয় । সেয়ে, এইকেইদিন ভাবিয়েই আছিলো বোলো এই বতৰতে ফলৰ ৰজা "আম"-ৰ বিষয়ে দুটিমান কথা লিখিম । আশা কৰিছো ফলমূলৰ এইহেন বতৰত আপোনাকো ৰজাই আনন্দিত কৰিছে !
পিচে আম এচকল মুখত ভৰাই জুতি লৈ আকৌ আগ্ৰহৰে আন এডোখৰ হাতত লওঁতে আপুনি বাৰু নাভাবেনে যে কিয় আমক "ফলৰ ৰজা" বুলি কোৱা হয় ?
যদি আপুনি জানে তেনেহলে চাগে নাভাবে কিন্তু যদি নাজানে .......................
তাকে ভাবি-ভাবি আম খাই কেতিয়ানো গুটিটোকো বাদ নিদিলে চাগে গমকে নাপালে ☺☺☺ !!!
খাওঁক-খাওঁক, ল'ৰা-ছোৱালীৰে সৈতে আপোনাৰ গোটেই ঘৰখনে সুখ আৰু আনন্দৰে আম খাওঁক । সিহঁত হালক দুচকল বেছিকৈ দিব, উঠি অহা নহয় বৰ প্ৰয়োজন । তাতে আকৌ স্মৃতি শক্তি, মনোযোগ আদিৰ বাবে পকা আম খুবেই উপকাৰী । ইয়াত থকা গ্লুটামিন এচিদে সিহঁতৰ মগজুত প্ৰচুৰ উপকাৰ সাধিব ।
এ ৰ'বচোন ৰ'ব, আম খাই সেই কাঁহীখন ধুই পেলাবলৈ কিয় নিছে ?
ভালেমান ৰস কাঁহীখনত এতিয়াও লাগি আছে । পইছা দি কিনি অনা বস্তু ।
এটা কাম কৰকচোন, তাত লাগি থকা ইমানখিনি ৰস আনক নহ'লেও ছোৱালীজনীকে মুখত সানিবলৈ দিয়ক । ছাল উজ্বল হ'ব আৰু মুখত য'দি ব্ৰণৰ সমস্যা আছে তাতো ই উপকাৰ সাধিব । পোন্ধৰ-বিছ মিনিট সময়ৰ পাছত মুখখন ধুইপেলালেই হ'ল ।
অঁ... পাৰিলে পকা আম কাটি মুখত লেপি পোন্ধৰ-বিছ মিনিট সময় ৰাখিব ।
এ হেৰি অ' ককাইদেউ , সিদিনা বৌক সেই ডাক্তৰে কিবা আইৰণ টেবলেট খাবলৈ দিয়া নাছিল জানো ? ডাইবেটিচ ৰোগ বৌৰ নাই যেতিয়া আম খাবলৈ দিয়ক । পকা আমত আছে কেলচিয়াম আৰু আইৰণ । অ' আৰু এটা কথা, আজিকালি মানুহৰ মুখত কলেষ্ট্ৰয়েল বঢ়াৰ কথা প্ৰায়ে শুনো । আমাৰ চৈধ্য পুৰুষ ওপৰলৈ গ'ল হয়তো এইবিলাক কলেষ্ট্ৰয়েল, ইউৰিক এচিদৰ নাম নুশুনিলে । ময়ো বত্ৰিশ-তেত্ৰিছ পাৰ কৰি বুঢ়াই হ'লোহি ,এইবিলাকৰ নাম শুনা বেছিকাল হোৱা নাই যেনিবা।
আম খাওঁক, এইবিলাক বেমাৰ-বেমাৰকে মোৰ আগত নাথাকিব । মনত ৰাখিব, পকা আমত থকা খাদ্যপ্ৰাণ (Vitamin) -C পেকটিন, ফাইবাৰ আদিয়ে শৰীৰৰ কলেষ্ট্ৰয়েল কমাই আনে । 
মই অহা গম পাই আইনুৱে ভিতৰত আম কাটিছেইযেন পাওঁ ! ময়ো খাব লাগে অ' ককাইদেউ, ওজন বহুত বাঢ়িল নহয় মোৰ । আগৰ নিচিনা সময় নাই আৰু । পেট দেখিছে, ওলাই গ'ল । অ' এতিয়া থাৰ্টি ফ'ৰ চাইজৰ পেনটোও অলপ টানযেনহে লগা হৈছেগৈ । শাৰীৰিক পৰিশ্ৰম যিমান লাগে সিমান নাই যে আমাৰ ! পিচে আমে ওজন কমোৱাতো সহায় কৰে দেই । লগতে কৈ থওঁ, ই হজম শক্তি বৃদ্ধি কৰে আৰু শৰীৰৰ অতিৰিক্ত কেল'ৰি পুৰি পেলাই ।
লৈ আনা আইনু, ইয়াতেই খাওঁ দিয়া ।
আচল কথাটো কোৱাইনাই নহয় । আমে হৃদৰোগ কমোৱাত সহায় কৰে বুজিছে । এইবোৰৰৰ উপৰিও আমৰ আৰু বহুতো গুণ আছে । ৰ'ব, মুখৰে গাই থাকিলে পাহৰিব গতিকে ফেচবুক জ্ঞান সম্ভাৰতে লিখি দিওঁ, নপঢ়াকৈ নাথাকিব আকৌ । আগতেও দলটোত আমপাতৰ এটা আচৰিত গুণৰ কথা কৈছিলো মনত আছেনে ?
ভাৰতীয় ঋষি-মুণি সকলে হাজাৰ-হাজাৰ বছৰৰ আগতেই সেই তথ্য আৱিষ্কাৰ কৰিছিল । যদি সঁচাই সেই লেখাটো পঢ়া নাছিল তেন্তে লিংকটো বাৰু দি দিছো https://m.facebook.com/groups/372830512757409?view=permalink&id=1260625513977900 আইনুকো পঢ়ি শুনাব ।
এতিয়া কওঁ আৰু এটা অতি গুৰুত্বপূৰ্ণ কথা । মনত ৰাখিব হলে ককাইদেউ । অ' বৌ এইফালে আহাঁ । ভিতৰতেনো সোমাই কি কৰি থাকা ? ভাল কথা কেইটিমান ওলাইছে বহিলৈ তুমিও শুনি লোৱা ।
আজিকালি কেন্সাৰ-ফেন্সাৰবোৰ মানুহৰ বেছিকে হোৱা হ'ল । আচলতে আমাৰ খাদ্য আৰু জীৱন-যাপন প্ৰণালীত আধুনিকতাৰ নামত হোৱা অত্যাচাৰ ইয়াৰ মূল কাৰণ । আগৰ সেই বুঢ়ালোকৰ কেইজনৰ কেন্সাৰ হোৱা শুনিছিলাহে ? আজি কথা এটা কওঁ আনকো ক'বা ।
পকা আমত থকা কুয়েৰসেটিন, আইচ'কুয়েৰচেটিন, গ্যালিক এচিদ, মিথাইলগ্যেলেট আদি উপাদান বিলাকে আমাৰ শৰীৰৰ কোষবোৰক কেন্সাৰৰ সতে যুঁজিলৈ 👊শক্তি দিয়ে । এক কথাত আম হৈছে কেন্সাৰ ৰোগৰ প্ৰতিৰোধক ।
তাৰোপৰি, আমত থকা ভিটামিন আৰু এন্টিঅক্সিডেন্টে শৰীৰৰ ৰোগ প্ৰতিৰোধৰ ক্ষমতা বৃদ্ধি কৰে ।
আজিকালিৰ ল'ৰা-ছোৱালীবোৰৰ সৰুতেই চচমা 👓 লগা হ'ল । আগৰ বুঢ়ালোক সকলৰ বহুতে গোটেই জীৱনটো চচমা পিন্ধি নাপালে ।
এইখিনিতেই কৈ থওঁ পকা আমত থকা প্ৰচুৰ পৰিমাণৰ খাদ্যপ্ৰাণ- 'ক' চকুৰ দৃষ্টিশক্তি বৃদ্ধি কৰে ।
ভগৱানে পৃথিৱীত যি দিছে সকলো অংক কৰিয়েই দিছে । কি জানে, প্ৰচণ্ড গৰমত আমে শৰীৰক দ্ৰুততাৰে ঠাণ্ডা কৰিব পাৰে । হিট ষ্ট্ৰ'কৰ পৰা ৰক্ষা পাবলৈ আম খোৱা উচিত । আৰু এটা সমস্যাৰ কথা উল্লেখ কৰি যাওঁ । গৰমদিনৰ সমস্যা । বিশেষকৈ ল'ৰাবোৰৰ বেছিকৈ হয় । মোৰো আছে সেই সমস্যা । গৰমৰ কালি দেহত থকা ক্ষাৰৰ বাবে চোলা-কাপোৰবোৰ অলপতে বৰ গোন্ধাই । ব্ৰ'ম হাইড্ৰচিচ বুলি কয় হ'বলা !
আমত থকা টাৰটাৰিক এচিদ আদিয়ে শৰীৰৰ ক্ষাৰ নিয়ন্ত্ৰণ কৰে ।
বা........ অহাৰপৰা কম বকি আছোনে, মুখেই জাপ যোৱা নাই !! অ' বৌ, মোৰ আমখোৱা অলপ সময় হ'ল দিয়া । যোৱাচোন-যোৱা, চাহ একাপ 🍮 অলপ কাৰাকে বনাবা । চেনি অলপ কমাই খাওঁ কিন্তু ................
অ'....., আমৰ কি কথা কৈ আছিলো !❓
বাৰু যিয়েই নহওঁক আৰু এটা কথা মনত পৰোঁতেই সৰুকৈ কৈ থওঁ । আজিকালি বহুতো পুৰুষেই কম বয়সতে পুৰুষত্বহীনতাৰ চিকাৰ হয় । এইটো এটা বৰ ডাঙৰ সমস্যা হৈ পৰিছে । ক'বলৈ বেয়া যদিও কৈ থোৱাটো ভাল বুলি ভাবিয়েইহে উল্লেখ কৰিছো । মন কৰিব, পকা আমত আছে যৌন হৰ্মন বৃদ্ধি ঘটাব পৰা ক্ষমতা লগতে ই কিডনীত সৃষ্টি হোৱা পাথৰ ধ্বংস কৰি দিব পাৰে ।
পকা আম হৈছে পুষ্টি প্ৰদায়ক, কেলৰিযুক্ত আৰু এন্টি-অক্সিডেন্ট সমৃদ্ধ । খাদ্যপ্ৰাণ 'ক' 'খ' 'খ-৬' 'গ' , কপাৰ, প্ৰায়োটিক ফাইবাৰ, পটাসিয়াম, মেগনেছিয়াম আৰু বিভিন্ন প্ৰয়োজনীয় উপাদানৰে সমৃদ্ধ ।
অ'.... বৌৱে চাহ বনাই আনিছেই । কিমান কথা কৈ থাকিম, চাহ কাপ খায়েই লওঁ ।
দিয়া-দিয়া, অ'হ লগতচোন এইবিলাক কিবাকিবি ধেৰ আনিছা ! এইফালে ককাইদেউকো দিয়া একাপ ।
বাঃ বৌ, ভাল বনাইচা দেই চাহকাপ !
ইচ, ময়োযে আৰু !!! চোৱাচোন, ইমানখিনি গালো-বালো ; অ' আচল কথাটোকে ক'বলৈ পাহৰিলো ।
শুনাচোন শুনিলোৱা । আমৰ পাত মধুমেহ ৰোগৰ মহৌষধ । ঔষধ এটা শিকাই দিম মনত ৰাখিবা কিন্তু । কি ঠিক, বুঢ়া হ'লে মোকো লাগি যাব পাৰে । আজিকালি ডাইবেটিচ মানে অসমীয়াত মধুমেহ হোৱা মানুহৰ সংখ্যা বৰকৈ বৃদ্ধি পাইছে । মধুমেহ আচলতে এটা ৰোগ নহয়, ই এক অৱস্থা ( ফেচবুক জ্ঞান সম্ভাৰত এই বিষয়ে পঢ়ক এই ঠিকনাত ( https://m.facebook.com/groups/372830512757409?view=permalink&id=897151313658657 ) । আপুনিও জানি সুখি হ'ব যে আমপাতেৰে ইয়াৰ নিয়ন্ত্ৰণ কৰিব পাৰি ।
কেইটামান আম পাত নিশা পাতলিয়া গৰমপানীত সিজাই নিশাটো পাতকেইটা পানীতে থৈ পুৱাতে পানীখিনি খাব লাগে । মধুমেহ নিয়ন্ত্ৰণ হয় । ই আকৌ লগতে পাকস্থলিৰো টনিক ।
এতিয়া গম পালেনে ককাইদেউ, কিয় আমক "ফলৰ ৰজা" বোলা হয় । গতিকে আম খাওঁক । আপুনি জানেই চাগে যে আম আমাৰ "ৰাষ্ট্ৰীয় ফল" । সমগ্ৰ পৃথিৱীত আমৰ প্ৰায় ৩৫-টামান প্ৰজাতি পোৱা যায় । ভাৰত আৰু চুবুৰীয়া দেশ বাংলাদেশত পোৱা আমৰ বৈজ্ঞানিক নাম 'Mengifera indica" ।
আমৰ ব্যৱহাৰ আমাৰ দেশত ইতিহাসে নজনা দিনৰেই পুৰণি । বিখ্যাত পৰিব্ৰাজক ইবন বটুটাৰ লেখনিতো উল্লেখ আছে ভাৰতীয় আমৰ কথা ।
বহু কথাই ক'লো । সিদিনাৰ পৰা আমৰ বিষয়ে পঢ়ি-শুনি কথাখিনি নকলে পেটত গেষ্ট্ৰক উঠিব নহয় সেয়ে, কৈয়ে পেলালো আৰু ।
তাতে আকৌ কথা এষাৰো আছে :
বোলে " হয় পো লনি,
হয় পো ধনী ,
হয় পো গোফে,
হয় পো মুখে । ।"
----- মই মুখ খনকেই বাছি লৈছো দিয়ক ।
পিচে যোৱাৰ সময়ত গুৱা এভাগকে নুখোৱাব জানো ?
তামোল এখন খাওঁ আৰু যাওঁ ।
আপুনি কি কৰে কৰক , মই উঠোহে ককাইদেউ ।
বোলো
দৌৰি-দৌৰি যাওঁ
গছত উঠি চাওঁ,
পকা-পকা আমবোৰ
মন খুলি খাওঁ । ------ হেঃ হে হেঃ
🎤🔉ফেচবুকত আমাৰ ঠিকনা📮
📶 8⃣0⃣1⃣1⃣......
💠🔸🔹⚫🔸🔹🔷🔹🔸⚫🔹🔸💠
No comments:
Post a Comment